朗聲四起

aiza isian Sesiu tu mas’an sinhasam, maupacin tahu tu, madaidaza mas tamacina.

Latuza’ik tu aizaanta amin bunun mas madadaingaz, aiza hudasnanaz, aiza hudaspingaz, aiza tama, aiza cina, aiza’ang a pantamaun, aiza’ang amin pancinaun. aiza ituTauluu halinga maupacin tahu tu, “mais dangian a lumah mas madaingaz hai, maszang mas dangian mas kadimun”. Paha asa kata mailangna tu mapisial madadaingaz.

maszang mas imita tu cina, talmas’antubuan a saia miahdi andidiip mas mita, matuningning a cina mas iskakaun; matuduku a cina mas sinbizakbizak, aupa mapising a cina mais aizain tu kauman panlaliva aat musulav. maupacia a cinaan tu miahdi cismita tu uvaaz, adu haiap a kata i?

maszang amin a tama, cis’uni mas uvaaz macinpunu kuzakuza, malmananu kasusui, nii tu matu’uni tu idahvian, nii tu matu’uni tu mahusbu, nau a tamaan tu macinpataz, sasduan ii na’asa mapinsial mas tastulumah tu sininhumis, adu haiap a kasu i?

cis’uni a tamacina mas mita tu uvaaz maupacia miahdi, paha asa katan uvaaz tu haiap miliskin maupatan tu singkadaidaz aat miliskin tu namakua masaunbaas mas sinkadaidaztan, asa kata uvaaz tu haiap samashing mas imita tu tamacina.

cinahu a tama tu, asa kata bunun tu samashing mas taingkadaan, mapisial mas itucina tu kautuszang, aupa isuu iskakaupa a sial hai maikusnasian amin mas taingkadaan, isuu amin a iskakaupa tamasaz hai sintauhumis amin mas itucina tu kautuszang.

tahuang a cina tu, asa kata bunun tu madaidaz amin mas mavala, aupa mavala hai itu’uvaaz tu aikusnadaan. mais mapisialta mavala, musasu samashing mas mavala hai, namupung a inaicia sintauhumis sia imita tu uvaazcin, mais maupacia hai, naminbauszang a imita mailangna.

Maza katan bunun mais minghumis nastucin hai, mataisah tu mintamacina mas uvaaz; mataisah tu mintastupadangi, mataisah tu minmavala, mataisah tu min tainkadaan, mataisah tu mintainkanaian, paha asata tu makadim mas inuskunantan, samashing mas madadaingaz, mapakasial mas tas’aan, madaidaz mas uvavaaz. mais maupacia a isuu tailian hai namalinaskal.

家有一老如有一寶，要尊敬長輩。母親辛苦懷胎十月，父親打拼不怕苦。父母為了孩子如此犧牲、辛苦。所以身為孩子的我們必須思考如何回報，尊重父母。我們必須尊重母舅家族、對嬤嬤的家族要好好相處，我們必須愛護親家，尊重親家，他們的祝福會降臨在孩子身上，如此後代必定興旺。

活在世上，有幸成為父（母）女（子），有幸成為叔姪、有幸成為甥舅。要珍惜這相處的時光，尊敬長輩、與親戚和睦、愛護晚輩。如此，將會有快樂的人生。