朗聲四起

sasan lo! hopa ci wagi nya kahun babaw bcilung mkaraw. m’es ci tuli kwara la’i Tayan. baha mcwa ga, nyu mnaga mosa m’was biru kwara naha.

ini naga kmayan yaba yaya lga, waya nanak mema r’yas ru msgus g’nux ku la’i Tayan la. cmi lukus myasa, panga kabang na pwasan biru, masu mani lga, waya mluw mosa m’was biru kwara la’i na alang Tayan la.

tehok blihun na pwasan biru lga, mstna naha psba biru ga kyan calay gaga naha kmayan maha, mgebu su! lokah su, psba biru!

mstna naha binah la’i m’was biru ga, kmayan loyi maha, Watan, mgebu su! Yayut, lokah su! m’es ci lungan naha kwara lla’i, ms’un miyuk sali na pwasan biru kwara naha.

miyuk sali na pwasan biru ku psba biru ga, kmayan mrhuw la’i maha, tuli! tuli kwara! mkura sku psba biru tmatuk tunux kwara naha. tama tman kwara lga, aring kya t’aring tkba ana nanu myasa yaw nku la’i Tayan la.

tehok ryax na tmuting mhngi m’was lga, t’enah mhtuw tanux kwara la’i m’was biru, kruma ga cyu tmkah boru, kruma ga cyu t’enah, kruma ga cyu mtama sasi hopa khoni, cyu kmayan yaw naha nanak.

tehok ryax na tmuting m’was lga, helaw ci miyuk sali pwasan biru kwara la’i Tayan, t’aring tkba sku ini ptna na biru.

malax pwasan biru lga, sa’ing sa’ing he naha cbing ’ba kwara la’i m’was biru, utux utux tputing mluw suruw kwara, sgagay naha psba biru, mhtuw tanux blihun pwasan biru. waya m’es ci mosa sali kwara naha.

gbyan lo! tehok sali kwara la’i Tayan lga, mbiya rgyax wagi uyi la. kwara yaya na la’i Tayan ga, rima nyu m’es ci mnaga la’i naha mwah sali.

pman naha he la’i ru, ms’un mani gbyan kwara utux sali naha. nyu m’es ci mnaga ke na la’i kwara naha, smoya mung la’i naha kmayan yaw na myasa, yaw na mnwah m’was biru utux ryax soni.

早上！太陽升起，泰雅小孩都高興起床。父母還沒說話，小孩就洗臉刷牙，著服背書包，早餐後都一起上學。到校對老師說，老師早，老師好。遇同學說，Watan你早，Yayut妳好。老師進教室，班長說起立！小學生向老師敬禮，坐下開始上課。下課就到到外面踢球、跑步、坐在樹下談天。上課鐘響很快進教室，學習不同課程。放學時倆倆牽手，排隊向老師說再見後回家。晚上！太陽下山。泰雅媽媽迎接小孩，給小孩洗澡一同晚餐，想聽上學時美好的事。