朗聲四起
niyadu’ nu maku i tida i Kaliku nu walian a dadipasan, u bangcalay cayay kaw cinglaway nu niyadu’an. idaw ku tusaay nu misilsilay a sa’wac i labu nu niyadu’, idaw ku caayay kaw talaka:way nu pinaan a adidi’:ay nu micapiay tu niyadu’ a buyu’an, macacebet ku langaw nu lutu atu kilakilangan, uyni han u kanglayan nu maku a niyadu’.
ya tusaay a sa’wac nu cilisan u kanamuhan nu maku a tayda, takelal sa ku nanum, yadah ku lilas atu mahicahicaay nu adidiay a butingan, sipud, kabus, singawaay atu kalang. kssatedepan nu bali, ya sa’wac mahida u tanayu’ay nu dadadinguan, mapacacuis ku mapadadinguay nu cilal atu tudtu’dan i nananum, mahida u limucedan misaysay:tu tu bukes. beliw sa ku bali makayda i pabaw nu nanum, kimkimkiman ku mapacilalay nu nanum, sapi’ sa ku balucu’ ita.
u masabacabacalay namin ku laku nu niyadu’ niyam, papalumaan tu siheciay nu lusay atu papalumaan tu lami’ nu bawbian, bangsis sa ku langaw nu mulangaway a tuu’d nu lutukan, lutucan, sasa nu kilakilangan yadah ku mulangaway nu milaladay a kamacal. lalud, i buyubuyuan sumanah: satu ku papah nu kuwawi, yadah ku masadipasay nu heci a kuwawian. kasadingsingan, i bukebukelalan maadih nu mita ku yadahay nu sumanahay a alemetan, kasienawan, u kasihecian nu kama, liw-ting atu cin-ci nu puu’an a nikasialaan, sicesicedaman cilcileminan ku asu’, ca:satu pisengal ku laway nu maku a singangay.
家鄉在花蓮東海岸，是一個美麗而寧靜的部落。部落裡有兩條小溪、幾座不高的山丘，還有茂密的森林。小溪是我最愛去的地方，溪水清澈，有許多小魚、小蝦和螃蟹。家鄉到處都是梯田、果園和菜園，春天是紅色野草莓，夏天是成串的野龍眼，到了秋天則長滿小紅野果，而冬天是柑橘、柳丁、金桔收成的季節。到了傍晚，部落裡家家戶戶炊煙裊裊，不時飄來飯香。