朗聲四起

yadah ku aasipen a cudad i picudadan nu ku-cung, macunus tu ku piasip aku namiku-cung, macunus ku tineng aku namiasip, sisa, manamuh tu kaku a miasip tu cudad. pakayni piasip aku tu cudad, pakaala kaku tu nu micudaay a kalipahakan nu balucu’, atu naybalucu’ay a sakasitineng, mahulak ku apa nu balucu’ aku. manamuh kaku maladay atu sakalecad nu balucu’ a cabay a miasip, uzuma, cacay sa kaku tayza picudadan a miasip, tayza patiyamay tu cudad a miasip tu kanamuhan aku a cudad. iza ku bangsis nu kasasizuma nu cudad, manamuh kaku a miasip tu cudad, miabibi atu misanek tu naycudaday a bangsis.

mahiza i labu nu bayu ku kasitineng nu cudad, ahebal sa, u kanamuhan nu tademaw a milakalak i sakalecad tu bayu a kasitinengan nu cudad. maabibi i kasitinengan nu cudad, malecad tu cacayay a liken nu bayu ku nikaadidi’ nu maku. namiasip tu cudad, zateng sa kaku, malecad tu nikungkuwan nu cudad a tademaw ku nikauzip aku, aku kya makungkuay i cudad, sakalipahakan sa. itawya, maladay tu ku adingu aku atu misulitay tu nacudadan, matahpu nu nikasitineng nu cudad kami.

i nikauzip aku, u caay ku mamalawpes a cabay aku ku cudad. micidek ku cudad i kauzipan ita a hekal, yadah ku masasumaay a sakalatademaw a cudad, u sakabecul nu maidihay tu tineng nu cudad a tademaw. macunus nu sakasitineng a cudad ku tineng aku, pacumuden nu pakungkuay a cudad kaku i kasasizuma a nikauzip nu hekal, patalakawen nu sakasitineng a cudad ku tineng aku tu sakalatademaw a nikauzip atu sapidiput tu niyazu’. miasip tu cudad, malilid ku adingu a mitukuh tu tadabangcalay a kakitizaan, mahulak ku masaeletay a balucu’, pakatepa tu sakatakelal nu balucu’, mahulak ku nikaapa nu balucu’, macunus ku tineng aku, sakatakelal sa ku nikalipahak nu balucu’.

micudad tu, macunus tu ku nikatineng aku, pakatesek a miazih tu tuud amin, tapabaw ku nikauzip, adakalipahakan ku picudad. iza ku kamu ni baki aku, “u siicelangay ku kasitineng, pakayni i piasip tu cudad ku sakasitinengaw,” sisa, haliasip kaku tu cudad, paaninen aku ku cimacima tu kabuhatan nu balucu’ atu kacunusan nu tineng aku.

國中開始喜歡閱讀。從閱讀中體會讀書的快樂，從書中獲得有趣的知識，也解答疑惑。喜歡和知心的同學一起閱讀，也喜歡到圖書館、到書店看書。每本書都有特殊的香味，我喜歡看書、摸書和聞書本的味道。

書本像是知識的海洋，寬廣無邊，歡迎大家進入書海的懷抱，我感到自己的渺小，就像海灘上的一粒沙。當我閱讀，就像是自己的生命經驗。那一刻，作者的靈魂與我融為一體，共同分享著書中世界。

讀書讓我學到更多知識、開闊視野、使生活更加精彩，是一件快樂的事。爺爺曾說：「知識就是力量，讀書是知識的來源」，我常常閱讀，也把閱讀後的心得與人分享。