朗聲四起

akiname kongadavane no ma’ava’avaymaname ka angilakese kimade ’icekale‚ mwada’anidra ko bawbaw, soswape tyapoy do’odo’o nodwavacini ko bawbaw ka, lakisa’apa kimade mwatawmoma ’akamolo.

nimadeiowa kisa’apa dwavaceka, anoabeyininga ka wadresenge kimade‚ no’ikayimade dadane madresedresenge ka lalrakimade ko ’odini no ’a’angatomyani no’atalekemyani maodopa’abee‚ no mwamadenga ko da’anini ko bawbaw ka, la’akamolo kimade angico’olo pata’athay na ma’awbonga, kwamidrako bawbaw i’apobaka mathiikani modowa ka, kya’adili kimade‚ nomwaninga na talegesane ka lawakimade drakeale toka’ange, walopokimade‚ no malramade na ka’ange na bee ka, la’angico’olo kimade bwa’ay ko bawbaw‚ ko tali’abayane no do’oini ka yikane kimade.

na’akamolini na tali’abayane ka pasopakimade, nomwaninga na talegesane ka lawa ki talimodowa kibakabaka, nokadromane ko tali’abaane no mae’eini ka tasapalangane nomyani‚ ninikibaka sapalangane ka lakadraw nabaka‚ nama’avaini na thakongadavane ka, ’iakayno makatolini na cavili ma’ava si ikasodolaa‚ nathabathabae no ma’avayni ka, ’iakay no pauvikayila la’iakay nomaupi’ini, si ioanga ma’ava’ava‚ amikiname nakay no ma’ava’avay name ka thakongadavane.

以前，若要跟一個女生交往，必須很早到女生家幫忙打掃、煮飯，如果女生家要去田裡工作，也要去幫忙。

若沒有辦法幫忙，他們從田裡回來時一定要去迎接，幫忙揹東西，平時到女生家作客，也要幫忙做家事。豐年祭時男生去捕魚或打獵，全數送給女方，我們不能拿來吃。