朗聲四起

harem kani siyakay sazu lra izu na pa’ilringan kana padadawakan, sazu kana kemazu na ’emaremeremeng na traatrekelan na tiyam, marayas muvasuk kazu zi semasirep kana kadadawakan kema na ngai, ulra papida na hayyu maranger za tremulretrulr zatu kadadikayan za tu ikasaayhu, zi maruwa pakadalikedik kema zi, maw na patalram semirep kana kadadawakan taw kazalramaw nina kinsas, nu mudulram ziya za padawak zi maranger lra za remetra’ mu, pasalaw kakuwalengan remetra’ inia na padadawak.

sazu na marekamelrimelri a padadawak, kamawan kana anvēitaming, K taming, hongcong, paypan, na palingangaling kana tranguru’ na yawtowan, tama, mavēi, zi na hayloin, nani na padawak maresaresan peniya, nu ngawngaway ta patalram semirep mu, salaw ta dalikedik zi semangal ata piniangeran i savak zi sazu ta piniangeran kamawan za uri wadaway ta, kema ta mapuangeanger, maw mu, nu malremes ziya izu na padawak mu, payas muteluk atu zazek, iniyan za kezang, ’azi maranger kikarun, nu ’azi semirep masalr mu, ’azi muwai dalikedik, maw izu na magiyan lra.

nani na padawak mu, salaw remanak zata zazek, pakakuwaatreng kanatu inudawayan nanta zazek, parualruwanay nu sawariyan ta lra semirep kana K taming ’azi lra pakaseput kana tu isi’, na patrev mu tu ranakaw ata singkēce, ’azi ta lra pakakuda kanata piniangeran, penungaw mupangdas, ’azi pakadikedikes zatu piniangeran kamawan za kinger elra za lrengaw zi muvavasuk zi venaavutrung lra. mazalram kanani ulra tu kuwatrengan nanni mu, maw mu nu uri raretra’ kanini na padadawak, marepazangal remetra’ kana tamaku, nu remetra’ ’azi semirep kana mavēi, hayloing, maherareher peniya tu zazek mukukutr, kiraarutreng, pureungeungetr pureuleule’, semeneng salaw kana pazangal remetra’. say nu muimeng lra nu mupatraran mu, ’azi pakaretra’ kanizu na padawak.

nani na kadadawakan mu, salaw pazangal atu trima’, nu uri aekan ta kinasayawariyan aruwa pida kuzulr palru kana pida kuzawan paisu, inta na zuma lra na ’azi mikaazu mu, ’azi ta pakatrima’. maw izu na kazuwan lra na kemazu pakalikudan lra mu mutrima’ lra tu ’uma, tu ruma’ tu pinizuwa, iniyan lra za karaemaemana, maw izu na ma’araw lra kana trau, trematrakaw za eman ziya, nu melri mu tu naniwananay lra tu zazek tu tratrima’ kana padadawak.

社會充滿了毒品的誘惑，夜店、酒吧常發生客人吸食毒品；有藝人嘗試吸毒遭到警方查獲。毒品的種類多，開始吸食感覺身心愉快，但毒性消失，頓時感覺心情低落、全身無力，只有再次吸食。毒品會毀壞身體器官，戒毒比戒菸還困難，甚至有人進出監獄多次仍是戒不掉。毒品價昂，吸毒人最後傾家蕩產，有的淪為小偷、強盜或出賣自己的肉體。

毒品入侵到學校。毒販利用學生的好奇心，引誘吸食，變成下線，賣毒品給其他學生。因此絕對不能嘗試。