朗聲四起

’esi na Kaosiung Menung(美濃) ’una ucani cimʉrʉ, capai cimʉrʉ makai kani “rong”. aranai nguain tamna navungu matarava icici, mapunarʉ mataa macasʉ cimʉrʉ isua. patanganaiʉn ka’ʉnai cau sua cimʉrʉ isua ia “cimʉrʉ rong(龍山)” kisʉʉn. ’esi na capici cimʉrʉ nesua, ’una pa ucani cimʉrʉ, sua nguain tamna capai ia, makai kani ararira, “cimʉrʉ ararira (龜山)” kisʉʉn cau ka’inia. miana ’akia ’inia cacanʉ, noo tiain mukusa sanivaria cimʉrʉ ia, tia maica na tapikupiku cacanʉ. imua tia macasʉ takananga mucaca.

miaa Ripun pa citai ia, noo tiain aranai Menung mukusa Rakuri(六龜), sua cacanʉ ia tia maica na龍山tamna icici, tapikupiku mataa araceni. mesua

’itumuru pa cakʉsʉ karu mataa cucumeni rangrang karu na cimʉrʉ isua. mesua pacʉpʉngʉ cau Ripun, tia mangʉtʉnʉ karu isua mapu’a na ’acangʉ cucumeni. imua, kekaku cu tia kamanʉngʉ cacanʉ, manasi tʉni cu tacucuʉn karu isua na cucumeni ’ʉnai.

aranai tia cu matiananai kacacanʉ, ’una cu tumatanparu arapiningi. mikarʉ kacaua cau mon ’inia kumakokoru kacacanʉ, nakai noo akini taniara cʉ’ʉrʉʉn,’akia kamʉcʉ nikorua miʉra cacanʉ. nipui’i sua cimʉrʉ makai miʉra masiraru capai. maka’ʉna pokari kacaua cau mon ’inia kumakoru kacacanʉ. nakai matʉa pa sua nikorua ’ʉnai ia, akini taniara nipui’i kavangvang sua cimʉrʉ, ’akia nikamanʉngʉa cacanʉ. cucuru mamʉmʉkʉ sua cau! ka’anʉ cu tavarʉ’ʉ tia pakʉnnanu?

mesua’una kani na sikara cimʉrʉ ucani “turikong(土地公)”. ’apaica nguani niurina musu’ʉvʉ na turikoong isua. koo miaranau pusu’ʉcʉpʉ sua sikiningi kacacanʉ cau. ’esi kani makari龍山mataa龜山makasi: “miseni cau tia kacacanʉ?”. “sii tia mutʉkʉtʉkʉ maica cimʉrʉ isi”. “ka’anʉ cau tavarʉ’ʉ ’una ku tatia ’intasʉ!”. “nakai tia ’una kangvang ka’icʉpʉa musu?”

“’inmamia ucani ka’icʉpʉa maku, nguai sua macasʉ, ’una tarupu anisi. takacicinia pacʉpʉngʉ neni sua isua?”

aranai mesua noo turupang cu kumakoru cacanʉ ia, ’uma’avungu nguani siarʉrʉ na tisikara ’ʉnai, cucuruava! ’akia cu tumatanparu arapining. siarʉrʉ isua, macasʉ ’una tasurusuru makai anisi.

高雄美濃有座山，形狀像龍，當地人稱為「龍山」。附近有座山狀如烏龜，當地人稱為「龜山」。日本時代決定開路後，就接連發生怪事，所挖的路都會不見，山形回復原貌，眾人很困惑。聽說山裡有座「土地公」，負責人前往祭拜。沒過多久就夢到龍山與龜山對話，其中提到，人類不知道我有多厲害！但是我只怕一種長長的、有尖牙的。自己去想那是什麼？開路的人得知那夢境後，每當完成工作後，就將鉅子埋在土裡。果然怪事就沒再發生了。