朗聲四起

Maq qabas ang a, heza tu tatini ka maletaz tu bunun, tastuqani’an lusqa ilumaq mal’uu, ni’i tu asa kuzakuza. Mililiskin a bunun tu na makuaq a na tudiip maqtu min’uni issu’ian tu bunun, lusqa ni’i tu kuzakuza. Heza tu tastuqani’an lispatazmasabaq epa, heza bunun a mesnadadaza deqanin minsuma mun’ita, tupa’un nepa ki mesnadadaza deqanin minsuma tu bunun ta tu, “ Tupa asa ia asu min’uni issu’ian tu bunun i? Maqtu asu. Lusqa tu asa asu tu kapimopa inaak sintupa ka sikopakopa tu qalinga. Mal’u’ang, niqo asu na anqai ki vanglaz’dengaz, na saduu ki vevivevi tu batu, siza’av a sedu’an su’u tu batu ka mapihaan ima su’u. Maq’qe siz’un in su’u ka batu ka mapihaan ima ka, min’uni epa tinsenkalsekal sadu’an tu kiim, isbalivav mapin’uni sui ka, na min’uni in asu is’suian tu bunun. Lusqa tu ma’aq is siza ka, asa tu lusqa ta’a ka siza’un, ma’aq is simadia siza ka, na ni’i ka batu minkiim, na ni’i tu maqtu isbaliv. Ma’aq is anqai ki navanglazdengaz a, asa tu me’opa haan tanangaus mudandaan, ni’i tu maqtu panduu, mopa na tinqoza ka batu tu saduu su’u ka na sankuaskuas musbai. Ka’a tu sakakiiv saduu ki, na tunqabin a batu. Ma’aq is ni’i asu kapimopa ki inaak tu qalinga ka, na minsuhai a kiim a minbatu. ”

Miliskin nepa tu langat i ni’i ka bunun a saduu, na simadia nepa siza batu mapihaan ima istaa ka, minpakaliva tu! Ma’aq is sisius nepa tu tas’a siza ki batu mapihaan ima ka, muqalqal a kiim haan nastu dalaq min’uni batu, paaq pu’un ni in maqtu sisuqesun. Allangat ni’i tu ni’i in maqtu musuqis siza ki ihaan tesbanan in tu batu ta. Tupa ka na siza ki batu tu bunun a tu, na heza ang haan tanangaus ta ka madaing tu batu, paaq pu’un istakunav istaa ka inin’ia in tu batu. Samuq is paskopin ta ka masu’uni madadaing tu batu, masu’uni in i atitikis tu batu.

Mintatulun in epa, sakakiiv epa saduu ki sintakunav istaa tu batu ka, tunqabin amin haan dalaq, ni’i in seqna’an saduu. tispalkav in a bunun a, paaq pu’un tupa in epa tu, “ Asa qa na lopa ko tu maqasmav kuzakuza, ka’a tu maletaz. ” Minkelas nepa ka, peskatudiip in epa matinqasmav munqoma ka, dungzav in epa min’uni mamantuk tu issuian tu bunun.

有個懶惰的人，整日不工作，只想變富人。有天，天上的說，一定要遵守我的話。你經過大河床，可以把所看見的石頭拿到手上，石頭會變成黃金，但只能拿一個，然後要往前走，不能停止，因為石頭會被嚇到會變回石頭。果然，他拿的石頭變成了黃金，多拿一塊時，黃金就變成石頭。他想前面還有大石頭，就把撿過的扔掉。未料，後面盡是小石頭。他後悔往回頭看所丟掉的石頭，全都看不見。

那人醒了過來，從此認真工作，成為富有的人。