朗聲四起

Heza qabas tu tatini Bununtuza ka qaqanup tu bunun tupa-un a ngaan tu Natuq. Ma-aq qabas is na qanup a, maqtu pasipapia munludun qanup, maqtu amin pasitatini munludun qanup. Miliskin nepa tu na azuq ata lusqa pasitatini munludun qanup, ma-aq is na asa kilim i madadaing tu titi ka na asa tu talmadia qani-an qanup, minsuuz tu na asa madas i nait na konun ta. Paaq pu-un lusqa nepa miliskin tu na matikhiv munludun qanup.

Mananu nepa ka alqanup i haval a, mavia mapalanduu ki tumaz a, tinnaniap nepa tu sadu-anan i tumaz ta. Miliskin tu, ma-aq is musbai ka, na listulunan istaa tutupa, ma-aq is masaa ka, na maszang i nibu panabatu tu panbusziq. Saduu tu kakasngiv in a tumaz a, tinbala nepa miliskin tu duuq na sia masihal is pinahiva mataz. Samuq is inikmangmang taknasanavan ma-un i hutan a, ni-i tu mimisbu kikis-ang.

Minsuma ka tumaz a saaksaak i issia ta tu lutbu, maqansu qan a sakun a, kas-aang tumaz tu minpuhuq in. Lusqa-un istaa nepa oskunun i pinenuk ansapaq mapundadaza haan kesaspatan matatnul a kequlpiqan tu lukisdengaz ta. Heza ita dusa masoqzang tu luqitumaz, maltatala tu asa in pakonan. Muqna ang a tumaz a munnastu lukis, kilim i baqlu tu nakonun.

Na muqaiv vali ka, asa tumaz munkunbu haan luak ta. Na ni-i in zaav tu na munkunbu ka bungu ka, sihapav a Natuq i qinabin istaa tu tunputikis istetaktak istaa ki tumaz a mapataz, tinsuu ka tumaz tintunqaz mataz. Mopaq i masmuav a lukis tu maqulpiq a, ni-i ka Natuq a maqtu munnastu.

Na heza muti-un tu al-u-an nepa idadaza haan lukis ta miqumis, tastas-a-un istaa ka luqitumaz mapataz ma-un. Maqansiap haan asang a bunun tu, heza ita ka tumaz sadu-an a, masmuav a lukis tu maqulpiq a madaqvasdengaz,paaq pu-un, ni-i tu nepun tu masiku-aq nepa. Na heza muti-un tu al-u-an a, sadu-anan i tastu-asang a bunun tu, heza tumaz telmadia in mataz, amin saduu tu madia malvasvas ita ka qinusqusan ma-un tu metuqnaz a, katnulan nai ta luluklas.

Dungzav in heza atikis tu seng-av a, tan-a-un tu issia Natuq tu sin-antalam. Masansamanqa nenka saduu ka, tudiip in nenka saduu ki Natuq tu idadaza haan lukis ta. Uu ka, siza nenka makuis tu duun maluqus i batu islabatu makonadadaza lukis ta, notu-an i maqulpiq tu duun a, maqtu in a Natuq mesnalukis ta munnastu, manahip in nepa munsuqis munhaan lumaq istaa.

從前有位布農獵人Natuq，在獵場遇到一隻母熊，就裝死想逃生。然而昨晚吃多了番薯，頻頻放屁，母熊聞到臭味，認為不新鮮，就啣他的衣服拖到大樹上，那裏有兩隻小熊在等待食物。母熊為了要找新鮮的食物便爬下樹覓食。太陽剛下山，熊爬上樹，Natuq就拿斧頭攻擊熊，母熊應聲倒地。Natuq只能待在樹上，餓了就殺小熊充飢。三個星期後，獵人們發現熊的屍體，又看到散落啃過的骨頭，發現Natuq在樹上，便用石頭綁細繩丟到樹上，再用大繩來固定，救下Natuq。