朗聲四起

mosola ecovi ’e cou a’toana ne noana’o, iho micu saasmoyʉskʉ ’o ’o’oko no haahocngʉ ta cou, tahecu aha’va tue’oha to maameoisi ’o pecʉa to haahocngʉ ne noana’o. ine mio, leahe toehunga yainca mionana koa yonghu ta haahocngʉ ho isi yaica, ho isicu ecovi ’e haahocngʉ tec’unana ʉmnʉ honcic’u mevcongʉ. 

nala yainca ecovi ne noana’o, mo maica ’o isi eʉsvʉta to mameoi, mosolanana na’no sino boemi tola iachia teoteai ci teesi no ngei, hocu seoe’isi seolʉlʉa ’o tee ecovi ci pecʉa, i’o ciengona to teesi, tee yaeza seo’tʉneni nomo na’no mah’tʉecʉ ci evi.

tenac’u ’enepio nate to’usnu ci haah’o, hocu toehunga zotʉk’ceni to ceoa ’o fnguu to isi ecovi ci hahocngʉ, isi sokoeva honci asngʉcʉ aot’ot’ou nate ecovi, ’omo cihi tenac’u i’momcovhi, ho e’tʉi ’o isi seo’tʉneni to pecʉa to hahocngʉ, honcic’u o’tena aot’ot’ou ’o hahocngʉ, tasicu ekameosi tomo e’tʉ ho e’tʉi.

’upena honci kuici congo ’o isi ecovi, tenahec’o ’ahʉya tue’oha ’o pecʉasi, pano mionana alʉ e’puyu ho mioci e’toheʉngcʉ, no hia kuici congo ho isi ecovi.

’ola yainca pecʉa ta hisi, zou ’omo aulʉ notaico ta hisi ta ngo’ngu, cimo yuso ho ake’i meoisi ci hisi.  

i’o hisi honci congo ho ocea poa tue’ohneni, tee maezo maica nate hia ti’a’ausna, ho poa noa to’usneni to mocmo ho tue’oha ‘o hisi.

homo congo ’o hisi maiten’e leacu’so poa aitneni to leaotothomʉhisi, micu na’no ʉmnʉ i’ola tititha mouyoyai ta hisi, honci tue’oha ‘o hisi tena ahoza po’usni tola koa yatunga ‘e ngayo, ho isicu tue’oha ’o hisi o’anamo congo.  

ci mio’sio ’oha ʉmnʉ ’e peis’a’ausna ta ecovi, ’ahʉya tue’oha na mion’a ʉmnʉ ci hisi, ho isi yaica, tee na’no kuici koa ’oha ʉmnʉ ta feango ta yatatiskova, honci o’te tiʉlʉlʉa tee asonʉ ku’kuici ho alʉ mcoi na yatatiskova.

mosocula nana esmi ta taivang na maaya, ihe aiti ’emo maica ci a’a’ausna, ihec’o ’osnia potani ho o’tena poa hioaneni.

ahoi ho mio, o’ana ohela hioa ta cou a’toana nala yainca ecovi.

在以前鄒族有拔門牙的習慣，男生在成年時，長老們會決定拔門牙，認為拔門牙才會好看才會帥，就可以準備結婚。古早的拔門牙，是用自製的蔴繩綁在門牙上，另一端綁在堅固的樹枝，就一下子很用力拉拔，有的因為痛到要暈倒。這樣的行為真的不好，原來好好的牙齒把它拔下來，對身體會造成傷害，要是弄不好會丟掉生命。後來這樣的行為就被日本人阻止，從那時起，鄒族拔門牙的習俗就沒有再延續下去。