朗聲四起

pano nana cihi ci thauke no aamcuyu, mionana sʉfeʉngnʉ emoyafo, biebimi no ntesi skuna ho poa yaahioa to aamcuyusi.

isi esvʉta tee maitola hia tohno tamo conohie, ho huhucmasa fii tomo coni ci peisu no king, hocu skuna ho poa uhto aamcuyu ho poa yaahioai. micu a’usnu no ma’hisio ’o huomia hie, mio i’vaho uhto ’oyona ’amamhimhino ’o thauke, panto mon’a yac’ʉ to ic’o ho uk’a hioa, isicu mi’usni ho yainca. “ ma... temu maezo uhto aamcuyu ho yahioai, ’a te’oeno fii note hmʉskʉ ci hnoo no yaahioai. ” micu a’ʉmtʉ uhne’e ho yahioa. 

ataveisi nemo cohiona, ho inemo ma’hituyu  no huomia hie no atavei no cohiona, mio i’vaho yuyafo ’o thauke, totiski ho eoho’ʉ tomo pio ci leyaahioa. micu mon’i ma’hieimo no huomia hie no ataveisi no cohiona, mio i’vaho uhto ’amamhimhino, ho aiti panto mioc’on’a yac’ʉ to ic’o, isi tuocosi….“ maincis’a conohie yac’ʉ tan’e ho uk’a hioa? ” ihe yut’inga ho yainca. “ maica uk’a cimo smuhnu a’mi. ”

isicu mi’usni to thauke ho yainca. “ ma temu maezo yʉmeʉmʉ ta aamcuyu’u ho yaahioa. ”

micu yofna, mi’usnu to thauke ’omo eyahafo ho mainca. “ acʉha eyooho’a ’omo yahioa, aangaezneni no ntehe hnoo, tohozi tomo uafeihi ho toc’ʉhi to moso muyo. ” i’omoso esmi ne micu ma’hieimo ho yaahioa, mio acʉhʉ mayo tomo coni ci peisu no king.

micu’so auski ’omo atva’esi sʉfeʉngnʉ ci cou, ho maezo mayo to hnoo, ihe yainca no koyuhe, ’a tees’a ahtuo’te man’ihe nantehe yaa ci hnoo, at’inghi ’o ihe yaa mioc’o maezo coni ci peisu no king.

ine ihecu yaa ’o peisu, micu eubut’u to thauke ho mainca, “ ’emo uafeihi yʉmeʉmʉ ci cou, mioc’o cono ma’hiezuhu ’o hia yaahioai, mimia cono hie yontomo cong’ehie ho peisngongoseo, ’o osko faeni ci hnoohe, maincis’a totiski ta osko faeni a’mi! ” isi yut’inga to thauke ho yainca. “ o’aos’o epuka na suu, o’a oskos’aeno tiova honci coni ci peisu no king na teko hnoo no conohie, yaa ’e peisu hocu maine’e. ho os’o fii tomo totiski suu ci hnoo ’omo ataveihe yaahioa, o’a te’oeno peelʉi titha ’e iachi’u peisu? nomio ho mi’o mealʉ ta cou, tekocu smo’eubut’u a’o? ”

o’a namo ya’ei ’omo cihi hocu maine’e, mainca ’omo cihi ci mameoi, “ maicac’o, ’o moso uafeihi tena nomuyo, ’o moso muyo tena uafeihi. ”

老闆去找人工作，約定每天發一枚銀幣給工人。上午9點到市場去雇一些工人，中午12點和下午3點，他又雇一些工人。下午五點鐘，他又去雇了一些工人。

傍晚，工人領工資，從最後進來的先付。五點鐘才來工作的人，每人一塊銀幣。最早來工作的人也是一塊銀幣，他們埋怨整天工作竟拿相同的錢！老闆說：「我沒有佔你們便宜。你們不是同意每天一塊銀幣？難道我無權使用自己的錢？為了我待人慷慨，你就忌妒？」