朗聲四起
Han qabasdaingazang haiza dadusa mantan maluan tu bunun, maca tatini a bananaz, maca tatini a binanau’az, malbubuntu ca dusa bunun mangki mintutuc silaluas bunun.
Haiza ta’a qani’an, munca’an at nai Diqanin makucaiv is sintuqumic. Kaca’anin hilav i Diqanin a, tupa dau ca sasaipuk hilava tu, “cimaca kilimun mu’u? malka ma’az amu munhan ti?” antalamun at nai tu, “na asa azam siza is sintuqumic i Diqanin.” latuza ca sasaipuk hilav a musu mungkumbu’ is suku is Diqanin siza is sincaiv Diqanin tu sintuqumic.
Maca maluan hala tu bununa luluklac is sasaipuk hilav ta tu mahaiva, asaun nai makucia inai ta tu qalinga mapuliva i is’ang cia. miliskin dau naingka tu mucqa na siliva naipa siza is mantan macial tu sintuqumic is Diqanin.
Tuza tu muliva ca sasaipuk hilava, silaliva’un cia ca biqi ciin kaunul siza. Sadu’an cia a, na mucuqais mahuvaiv siza i mamantuk tu sincaiv, samuqat tincuku’in ca suku i Diqanina.
Tupa ca sasaipuk hilava tu, “muliva ca sinsiza mu sintuqumic Diqanin.” musu ca maluan bununa antalam tu, “tupa ca Diqanina zamin tu, nitu kua siza is sincacaiv sasaipuk hilav bunun aiza.” Ta’uni naingka tu na ciat macial tu sincacaiv ulivaun cia siza, situnuun nai ca biqi ciin kaunula siza musu kat nai mudaan.
Kamimicqang ha’an daan a, ulav ca binanau’az a intasalas talbiqian ca qaungqaungan, maca bananaza a, tankaunulan ca kaav icia. na cuqaisun nai ca siniza nai ka biqi ciin kunula a. tupa dau ca sasaipuk hilav a bunun tu, “maupa’i pinsama’azun nak mu’u, silaluan amu zakun tupa tu nitu kua na siza i muliva tu sincaiv, macu’nuq daingaz ca Diqanin tu tan’as maupati a qalinga , mamangun cia macuku ca hilav is suku a. anaqat paimu’avin ca biqi ciin kaunulun!
Maca sinpatas dii taqu itun tu ma ata bunun asa tu matukutuku ca bazba ciin hinuzangan,nitu qalmang lilaluan is bunun maupati a na maqtu macial ca iniqumican nita.
一對男女騙子到天神那裡騙贈禮、擾亂看門者。看門的把贈禮拿成肉瘤和凸瘤。當他發現拿錯要回去更換時，倉庫門已經關閉。騙子誤以為看門者拿了更好的贈禮便說：「天神對我們說，沒有關係的，看門給你什麼，就拿什麼。」回去到半路上，女子脖子上長出條狀肉瘤，男的頭角上長出凸起肉瘤。他們要把肉瘤還回去，看門的說：「因為你們讓我混亂，天神聽了發怒，因此把府庫的門關上了。所以，這脖子上的肉瘤和頭角上的肉瘤就給你們吧！」