朗聲四起

Tunganin ca inulu’an han maklang tu qani’anan, na kitnga’in munhan sipulan masipul, manahip ca is’ang naak antala baqlu tu sinipulan, maca kitnga’in masipul a na taau in ca pangka’ naam, na min’unin azam masitauqas han sipulan.

Ha’an baqlu tu sinipulan, pacais is baqlu ka kuciusingsi’, maca baqlu ka kuciusingsi’ a Bunun, madaqvas talmindu sadu’an maqanglac untu, matuqainan malkacia masisipul, qalna haiza naam ma kaipisingan han kuciusingsi’, maupa kivisi’ malkacia inam sinipulan tu is’ang, kivisi’ sadu inam sinhuzanghuzang han sipulan , maupati ca inam baqlu tu sinipulan.

Maca kitnga’in munca’an sipulan masipul a, taau in ca pangka’ naam, na mu’hazin ta’aqamisan han sipulan masipul, na siking munhan sipulandaqvas, anaqat asa tu minmantuk minqasmav masipul. haiza tastuqani’an mul’uu masipul, tan’a luklac ca tataqu tupa tu, maca luklaca ngan na munhana dangi’an kuciusingsi’ ta kilim i kuciusingsi’, Tiang, Tokduz, Lian, Umin, Ali, Soqut, cikopa ka luklacan ngan na kava munhan kuciusingsi’ ta.

Matu kahanin dangi’an kuciusingsi’ a, makaming ca is’ang nak mapising, maupa muc’anang azak pasadu kuciusingsi’, ni amin cam maqanciap tu ma’az ca sinkukuza, cuna luklacan punhan kuciusingsi’ ti, tititi’ ca is’ang mapising mukumbu. ihan azam hilav tupa tu, kuciusingsi’ haizin azam. minahan a cia kumbu’ tupa tu, mukumbu’ a dii. tau’un zaku ca hilav mapising ca mata sadu cia, ai! saduu cak mataisqang a daqais sandauqlac ca nipun maqainan saduu zamun, tupa tu mulungqu’a, maca is’ang inak tinnac’ak, uka’in i mapising tu iniliskinan mukumbu’.

Tinan’a amin azam ihan acang madadaingaz palcicia kuciusingsi’ talmindung tu liniqaiban. tan’a tu malmananu’ dau pismali’, maca sinludaq mali’ a masqung a masauqbung  papasting ca mali’, kalicoqcoq nitu maqtu taqdutan. asa amin azak pismali’.

Maca sadu mataisqang masaningsing matuqainan a kuciusingsi’, tan’a amin sin’aincun cia tu qalinga ha, muhibuli sintan’a han madadaingaz tu qalinga, mukumbu’ han inak tu is’ang ciin iniliskinan. minatudip pin’uni’un zaku ca kuciusingsi’ min inak sisilian tu bunun miqumic.

Icia ti qainan it kuciusingsi’ tu tamasaz, min’uni inak macial tu iniliskinan.

暑假結束後，即將升上國中三年級，即將成為學校的大學長。新校長是原住民，長得帥、喜歡運動、開玩笑，但是平時非常的嚴格，這就是我們新的開始。國中三年級開始要認真學習，有一次要找校長，但到了校長室，卻不敢進去，因為當時非常的怕他，但是進去後校長竟然對我微笑，我當下沒想很多，就直接進去。我在部落也聽到了許多校長年輕時的故事，校長以前喜歡打排球，非常厲害。從那次談話之後，我就把校長當作我的楷模。