朗聲四起

Uka’in is makucia qanvang laqanvang is pi’anuman han acang inam, maca tastu’acang bunun a matumacqing is qanvang tu miniqdi kukuza paka’un is tastu’acang a bunun, anaqat mu’amin ca tastu’acang nitu ma’un qasu’qanvang, tupa ca madadaingaz tu, nitu maqtu ma’us qasu’qanvang. maca ma’us qasu’qanvang a, na ulav tis’ia.

Maca munququma tu bunun a, altupat ni’in ca qanvang islaqanvang, picihalun nai ca qanvang masaipuk. Haiza ta’a madaing a qatung’av, ihan tantangaus is lumaq it qudasnau’az naak, mina dangi’as danum, maupa’i haiza ca uva’az iha’anta lacbauq qabas, anaqat aminun ca danum sicupcup ma’uman, pacaisan macuaz is padan na paka’us qanvang, haiza ca ni’in islaqanvang tu qanvang, hanunta maluquc, hanta malisvala mama’us padan.

Maca sila qatung’av a, haiza madadaqvas a qaqaul, maca navung i qaqaul, dangi’as qanvang mul’uu mintuhivhiv, mintun naak saduu qanvang ihan taaq lingkulingku. paskucun ca qanvang, maca cikua ca udada’nan cia a, na kaupa ca kaiduqpusan duun cia, ihanta taikbilulu, malisvala daukdauk mama’us muut, nitu lungu qalmang sibutbut is duun.

Ihanta ca qanvang maliscial mul’uu makucia visvis mavivisvis is liu han hiku cia, ma azam uvava’az a asa katdia maqatumu madaing a tian is qanvang, maupa’i mapising is vaqa cia, anaqat mu’ha azam ican ngalan sadu.

Ihanta azam paqaqainan, haiza ta’a qani’an, ihan ca qanvang navung lukbu mul’uu, ingalan azam matunu’ hutan, mul’uu azam is sintunu’ hutan a, nitu maqanciap tu cima ca mabatu taaq, sasbai ca pantuqasun naak, mamang ca taaq matacqait hala pok! panhan tian i qanvang, nit samu makua ca qanvang mu’haz ihanta mama’us padan.

Siza azam is taaq, mababatu tian i qanvang, matu laupang, mu’haz ca qanvang mintangqa ca bungu, pipitpit ca mata, matacqait hala mavisvis is visvis, malcukdung mama’us muut, buntu’an zami matacqait mababatu, mucqa mindangkaz tu’ia tu vis! asa matisqat is duun na minbac zamin, na musbai azam a, mucqa saduus taimiqanvang angkuc is qulaisva sinap zamun, mu’amin nam tinpising maqacibang hala tinvasvas musbai’.

Talmadia’in azak nitu saduu qavang a, utu mauqna saduu qanvang a, ni’in tu ciat maqasmav laqaqanvang maliscial mama’us muut a qavang, mu’hazin ciat ihan daza is tomi mungqalili a qasu’qanvang. 

敘述牛對人們付出及人對牛的感念。牛如何悠閒度過晚年的生活；孩子們有趣的童年生活，孩子們跟牛的互動過程。從此之後，和牛的關係隨著童年的褪去而逐漸模糊，等再和牛相遇已是多年之後。但不是一隻在田裡辛苦耕作的牛，也不是優雅咀嚼牧草的牛，而是漂浮在碗裡的牛肉。