朗聲四起

kiariari maruka ucani miararuma Hla’alua, ucanita pihlingi rahluacu hlialukaala arukarumuku muriparana, kuiangʉtʉngʉtʉhlʉ umahlikua ’ihlicu langica makini mamaini, ulavaisa mahlialukala maahlʉ caihli, iniciki pitarucani acalaiaʉ mamaini ahlaina, kani’i mamaini ahlainana pitataisa mavacangʉ vulaihli, pihlitulakua cumi’i tam arumukaʉisaka cucu’u mʉmʉa.

aucaucani aari, aratataisacuka ’Uusu, angahli acalaiaʉ mamaini, malavalʉ arataisa masalangʉsangicu ahlaina, umahlikua ta’iara salia, tam pitʉkʉtʉkʉa mavacangʉ, maniki avavu、turarapurua、tumatinʉnʉ, uka’a cacihli mataingalʉisana, acahlimii masalangʉsangʉ hla tam pacʉcʉpʉngʉ ahlaina, ihlaisa ma miararuma uatʉahla tʉkʉtʉkʉa hlahlahlusa ahlukuaʉ pauahlahlaina.

ahli’aimau amaisa nua inaisa, ucanisanaka mamainisa ahlaina, hla mainimanaka caihlisa, maniki tumahlaʉka cucu’u, arupauauhli mahlukua saliaisa ’Uusu pauahlahlaina, mairaahlu kutararianʉ matialu, apuailisa rahluua aramurua rasaʉ hla muripakʉpakicuka hlahlusa mahlukaku kuaisana, minisuacu pitikicu uavalʉ misukasʉ, akuisa musalaka hlamamaisa ’Uusuna, mʉrʉcʉka ahla taku’iarʉ, musala hlahlusana mahluku salia ’Uusuna, tumahlisuluisana marikua vahlita arikakua hlikikialangʉa ’ʉvʉngʉ, apulukuluku tahluuru, hlacahluma pusungusingusipi cumahlumu.

puailika inaisa salia rumahlaʉ, kupaitʉahlʉ acalaiaisa mamainisa ahlaina, musa mahlukua miararuma, pakisusuahlai cucu’u, mairaahlu uka’aka ’Uusu, sʉsʉmacu kunapuailika ’Uusu, tupurucua inaisa, kitʉra vahlita tumangitangi, upapapalu umahlikua ’ihlicu langica, pitaisa maluliri, maci marua tuahlʉ malia ili’Uusuku ia, apuria usumanicukuisana.

murulʉmʉlʉmʉka cacihli ’arʉmʉ murumita, amihla kana’ana tuahlikua ’Uusu maliaili, mʉlivicuka inaisa maimacu, pasakulaika ’arʉmʉ, tapikakuahlikalia’ʉvʉngʉ, pasakulai kumali, ulavaisa maliailimana hla maliapupulucu hluruania ’Uusuna. puailia ’Uusu salia rumahlaʉ, aramuamuricu arahlatʉra, takuacahliaka cucutakuliacʉna hlamalivutua inaisa ’Uusuna uvura’arʉmʉna, akuainitaka pakiaturu hlipimiaisa, tumuacua ’Uusuna matia’ʉrʉcʉ ’arʉmʉna micikirika, kuapuasalaka cucutakuliacʉna hlaka’ana, micʉcʉngʉhlʉ hlapapapaci, kilalialia ’arʉmʉna maluliri, mahlava ’Uusuna micuhlu, tapilalaluihli cacapuka tapatapaʉa, hlipangʉngʉtʉhlʉisa hlalungu hla tapaʉ, makacani tuma’anguhla kucupaitʉahlʉa cucutakulaicʉna hlakana’ana, ulavaisa ia, pakiturucua ’Uusuna hlipimia, muriusumanicu ’arʉmʉna maruvuvurunga mangusipi.

從前有對結婚已久的夫婦，在結婚10年後生下女兒’usu。’usu從女孩變成美麗的女人，是眾人心儀的對象。爸媽覺得’usu還小，總是回絕作媒，有人心生憤怒，把’usu騙到家外，使其掉入陷阱埋起來。媽媽找不到女兒，向上天大聲祈求，誰能救出’usu，就要將’usu許配給他。

穿山甲救出奄奄一息的’usu，卻讓壞心的人發現，媽媽要’usu跟穿山甲趕快逃離，穿山甲口中念咒，帶’usu穿過五節芒和月桃葉，壞人再也找不到他們。最後，’usu下嫁給穿山甲，生活在山中。