朗聲四起

noka SaySiyat ’oka’ ka ’ima maynonak kakrarotonan kaspengan no ’al’alak, hayza’ ma’ ray kapaSbaki’an noka tatini’ pina’alowa’ a binalong. noka SaySiyat kaspengan. ’aring ’o’owa’ tabin tatini’, ’i’ini i Sekla’ ka ’oemaeh, ma’ hayza’ nom pabasez pakra:am ka kaspengan. tani ’in nonak a Sinrahoe’ kapaSbaki’an, nak pa’alowa’ tomortoroe’ ka howaw, ray pinapoe’oe’an ra:an, tanikawaS pinanra:an, mabasez, ’ibabaw, makaksi’ael o masay, ray kin’i’iyaehan nak hayza’ ka’intani’an, ra:am ila komoSa’ ray ’ima ’awmomza’, ’ima ’iyasiwi’ mabasez ila saboeh. ra:am ila komoSa’ kin’i’iyaeh naka kaspengan pabasez ka mae’iyaeh.

’ana rayno’ So: tatini’ ’am ’omangang ka ’al’alak ’am tomortoroe’, ’ana ’ima sa’owaz a ’ima ’awmomza’, ’al’alak mina tani pinayaka:i’ tiSkobae:oeh Sa’, “’a:ay!” hini ’isa:a’ noka ’al’alak kataniSowawan kaspengan. tatini’ ma’ kayni’ a tomal noka ’al’alak Sikba:in a tikot nak ’oka’ ka pae’zo’. ’isa:a’ kakhayza’an hayza’ ka kaspengan nom tomalam ka ’al’alak Sa’, “tatngor ila.”

’aehae’ howaw koSa’en malakem. So: ’okay makSa’ potngor ray hito’, mari’ ka ta’oeloeh noka ’aelae’, Sibihin ka pinobae:aeh maray kaSlar paktata:a’en rae’oe:en, ma’ mae’rem ki ’inokik tal’izaeh ka ta’oeloeh. ’am lobih ila, ma’ wawa:ih ’am pama’ a komalahang ’okay kakonibih.

’aehae’ naehan koSa’en hombel ka nepen. kamamanra:an ’oka’ ka ka’o:olan, So: rima’ ka ba:i’ makSa’ baba:ok, wawalae’ ka bori: sini’ael, Sibo:ay ka tatini’ a ’ima ’okik wa’isan; ma’ komoSa’ pahola’ ka kasnaw rinae’oe:, ma’ ’okay mintatiyal kayzaeh kapanra:anan. minkoringan ’oka’ ka ka’o:olan Sa’ tatngor ila ka tinal’oemaeh, ma’ komoSa’ ’amkay biSbiS ka nepen, kayzaeh nom komalahang ka taew’an.

’aehae’ naehan noka tatini’ totrongen ’okay koSa’ min’i:il. ray ’am patabil a kakrarotonan noka mae’iyaeh Si’iyaka:i’ Sa’ ba:in mina pakSikar ka tatini’, ma’ ’aewhay nonak. ’ima ba:in kayni’ noka saboeh, ’ana komoSa’ mae’iyaeh kayaeh a taew’an liyaboe’ ma’ ’okaS nanaw.

koSa’en malakem ki hombel ka ka’o:olan ’isahini ’oka’ ila. ’isahini paSta’ay ’am tomkaw mari’ ka ’ineseng mininSa’la’ tomalam tomkaw, ’al’alak ’ima monhael rima’ noka ’aza’ hawaken pakaSbaboyen rima’ tomalam. hini to:o’ hae:wan ’inokik pakkayzaeh ka pinae’rem ka kinnarmeS ki hina’azem tinalam ma’ ’iwan naka katatngoran kaspengan.

賽夏成年無特別儀式僅於祖靈祭長老訓勉。從出生成長或結婚死亡，不論場合，年長者教導，長輩忌諱年輕人的懶與膽小。儀式考驗，一為出草從敵首喉頭接飲流淌的酒或與頭顱共眠，返途輪流背負。另拔牙，男性缺門牙，空氣入肚易飽少吃而轉給老弱，亦控制身材不致影響行動。女性缺齒表示適婚年齡。

長輩可差使，尤其祭典被稱懶惰蒙羞。出草拔牙至今已無，差遣也思維改變。paSta’ay跳取芒草，初試者主祭帶領試跳，連續三天是耐力與意志力試煉的成年禮。