朗聲四起

’ataw ray kakiStatngoran o ’ima tomal noka to’oya’ tinil’itol kakiSka:atan ’ima kiSka:at. nisiya taew’an ’okik liyabo’, yaba’ kamamiyalawa’ ka kaSir’aran. papi ’am pak’akoey ka minari’ rayhil, siya rima’ tal’izaeh ka minsae:pae’ honaehnge: ila. ’ataw ma’az’azem hi yaba’ matawaw kin hopay, ’isa:a’ So: honasamez ma’ rima’ kanyaba’ ’ay kapatawawan tatilhaehael, paSpaSotaew’an paySiri:in, ka minsae:pae’ mari’in Siboeloe’.

’aehae’ hahila: ’ataw homiba: ka ’ima ’itoSan katoeh ki hahngae’, mam komontotol ka ka’aSkanan ka minsae:pae’ kaS’abo’ ray ’ilibita’ ’am manakiS kil ’aehae’ ’oya’ ’ima maraS ka korkoring. hiza ’oya’ komita’ hisiya, tomortoroe’ ka korkoring Sa’, “So’o mina pakakreng kiSka:at mayhael ’izi’ nak hisiya, tatngor ila o matawaw ka kamaboeloe’ ka minsae:pae’, ’ana kano’ ma’ haSa’. nakhini ’ana ’inowan ma’ ’am hopay!” ni hiza ’oya’ pinayaka:i’ ’aewhay bazae’en, ’okay koSa’ ’ataw haysaza!

bi:il ila hiza ’oya’ ra:am Sa’, ’ataw noka kamamiyalawa’ korkoring, So: honasamez mowa:i’ tatilhaehael. ’isa:a’ ra:am komoSa’ ’okay paylal’oz. ni ’ataw kapa’onhaelan tiSkorowa’en Sa’, “kamaboeloe’ ka minsae:pae’ mina ’okik koSa’ ’oka’ ka wa’is! lasiya ’okik ’akoey ka rayhil, ma’ komilwa’is nonak. So’o mina tiSkobih ila ka saboeh no ’inokik paylal’oz! ”

kapatawawen ’okay koSa’ kayzaeh a ’aewhay. nawSa’ tahoki’ saboeh, miya’akoey ka tinikaehaew, ’am hiya’ ila boeloe’ ka sae:pae’, kora:an, mamowa’ ka tatimae’? ’ita’ ra:am ila! haeba:an ka kamamatawaw romarang a tipangihin, pinatawaw hopay. kamamaSa:eng ray tinaew’anan ’okay pakhara:i’, mina ’oka’ ka howaw komoSa’ ’ima hopay matawaw ’ima siyobaz ka mae’iyaeh.

’ataw是碩士高材生，出身平凡。爸爸是大樓警衛並兼差清垃圾。有空便協助爸爸收垃圾。有次’ataw穿著短褲推著推車，和一對母子共乘電梯。母親機會教育孩子，要用功念書，將來不要收垃圾，生活很苦！ 他忍到出電梯。回頭勉勵小男孩要用功念書，別像我在學校總是名列前茅，一路進研究所。那母親得知’ataw是警衛之子，空時來幫忙，故特地向他道歉。清道夫不是沒有用的人！或許貧窮但努力生活。該道歉！

職業不分貴賤，辛苦工作的人不是人生輸家。