朗聲四起

yaba’, ’inay kanSo’ masa’ pakra:am So’o hopay ila! Sa’la’ So’o ngalngalngal Sa’, “pinatawaw Sam’iyaeh tinal’oemaeh ila ’ana kano’ ma’ ’oka’ nanaw...” yako Sobaeh a tomalan.

So’o matawaw kin honaehnge:, ’okay ha:tahoki’, ma’ ’oka’ ka taew’an, ’oka’ ka rayhil rinoton. ma’an babo:ay no kiniSka:at ma’ Sinibae:aeh nonak. ’ana nak’isaza ma’ ’amkay koSa’ niSo’ ’oka’ ka pinatawawan, ’okik paylal’oz ka kinalahangan.

yaba’, ’ana ’oka’ ka ’in nonak a taew’an ma’ kayzaeh, ’ita’ maSekSa’ rayno’ taew’an ma’ risaza. nak ’ima liyaboe’ ka kin’i’iyaeh hina’azem ’iSka ’inoSa’ kayzaeh ay? Somibae:aeh ka rayhil Sibo:ay ka kiniSka:atan ’iyangkowa’? koma:at ka Sinibae:aehan, ya:o ra:am hini kohay kapinobihin nonak. ya:o ’am makakreng kiSka:at, So: kaSlatar ila matawaw ’isa:a’ kapinpinobihin ma’an. hini mina ’okik hingha’ komoSa’, So’o komalahang ay ka korkoring? ’oka’ ka rinoton ma’ kayzaeh, So’o soka’ mangowip ila ay mita’ ray taew’an hayza’ ka ’ima sopaloy karotonan ka ’ima kayzaeh hina’azem. nimon bino:ay ’iniya’om sowisowiti’in ’aSkanen ray rinoton. niSo’ pinanra:anan ki kinra:aman tani tinortoroe’ pakra:am hi yami. koSa’ ’izi’ i Sa’i:i’, narmeS, pakkaykayzaehan kil saboeh, ’ana hayza’ ka rayhil ma’ ’oka’ kabae:iwen.

So’o ’okay papnabih yami ma’ ra:am niSo’ ka hina’azem. yami So: honasamez kamakanSo’ kabih romae’oe: ka kashaw ’a’iyalatar. So’o ra:am ay hini mina ’isa:a’ ’ima kayzaeh ka kin’i’iyaeh? ’ana ya:o ’okaS ka kiniSka:at, haysiya mam lomoehloehay ha:kamamalahang, tani niSo’ kinilih’er, ya:o ma’ ’am tamemeS tatoroe’. So’o pakha:olhoel ’iniya’om, ya:o ma’ hayza’ ka wa’is matawaw. ray kapatawawan ya:o ’am mobo:ay ka wa’is hi lasiya.

yaba’, hayza’ ka ’ima ’ibabaw kaSa:engen a raro:o’ rinokol mina ’oka’ ka howaw kanSo’ ka pinatawawan. niSo’ bino:ay ma’an kapatpatopa: ka saboeh. yaba’ ma’alo’ a tomalan!

親愛的老爸，你眼底有疲倦。讓我好心疼！工作多年無恆產，但不表示你一無所成，否定你的付出。豪華的家人卻冷漠，有何用？貸款繳學費為自己負責，用功念書，工作再繳清學費。家有存「愛」大銀行，你的愛一一存在「心」的銀行。有空時，總愛和你喝咖啡聊天。親愛的老爸，我不是高材生，只是一個實習護士，但因為你的鼓勵和期望，我會試著在自己的領域中做到最好。親愛的老爸，你給我們的一切，都讓我覺得驕傲。老爸！謝謝你！