朗聲四起

kizaw mam koma:at, mahoero: kahiya’ ’inaSkan ka karae’oe:en haysiya ray kapak’iya’zawan ’i’ini’ i ’ameti, ’isa:a’ min’itol rima’ mari’. ’okik ra:ami, homawaeh ka ’a’leb Sahoero: ka ’ima habiyalan ralom ’ima mengreng. kizaw ma’az’azem Sa’, ’ampowa’ hini kapak’iya’zawan kin hara:i’? ni hiya’ pinahara:i’?

kizaw mam komi:im karae’oe:en nisiya, ’isa:a’ Sahoero: ila. ’ima mayha’ha’ ka karae’oe:en malbel Sisae:aeh hinghingha’an ila nanaw. paeh! ’am powa’ nakhini nay? ’a:ay! ’ima kayzaeh karae’oe:en minayngaso’ ’ititi’an ila nanaw! ’iwa’ ay! ray kapak’iya’zawan hayza’ ka ’ima babiyalan ’ima mengreng, hini ’inmana’a karae’oe:en pakalbelen losae:aeh o! ’iwa’ ’oya’ rengreng ’omangang Sa’, “’izi’ i ’aSkan ka ’inokay ’il’ameti ka karae’oe:en ray kapak’iya’zawan mina! So: pakalbelen ’oya’ ’am hopay tal’izaeh ka linowangan!” ni ’oya’ pinanabih sa’owaz a tomal, ’okik bazae’ ’am hopay nonak!

kizaw ’am mari’ nanaw ka karae’oe:en ka’itayso:en, ’oka’ o, siya ma’az’azem hi ’oya’ homawan ’am pat’izaeh ka kapak’iya’zawan hopay a tomalan, siya ma’ ’okik koSa’ ka’itayso:en rae:iw ila. ’a:ay! nawSa’ ra:am bazbazae’ ni ’oya’ ka pinanabih, ’okay pat’a’a:ih ka rinae’oe:an ma’ ’am ’okik nakhini pakalbelen losae:sae:aeh ’ana hayno’ ma’ pakhara:i’in ila. ma’an ’inaSkan o ’am nak’ino’ komoSa’ ’itayso:en?

’isa:a’ kizaw minkakamoeh mari’ ka tati:iS, tani tinortoroe’ ni ’oya’ tomi:iS ka kapak’iya’zawan. minSa’la’ mal’oehaez ka ’inaSkan, ’aehae’ ’aehae’ ti:iSin. kayzaeh ila o tomi:iS ray ’i:zo’ ka ’ima hara:i’. sizaeh ila saboeh ka tini:iS, ’alro:or ka ’inaSkan patibihin, bi:il ila tomi:iS ila ka rape: ’ima hara:i’.

kizaw komitkita’ ka ’ima ’iyatilka: ka tini:iSan, siya ma’az’azem Sa’, ni ’oya’ pinayaka:i’ sa’owaz a tomalan. So: yako ra:am paka:i’ ni ’oya’ ka tinortoroe’ ma’ ’am ’okay pakhara:i’ ka kapak’iya’zawan. kayzaeh ya:o tani tinortoroe’ ni ’oya’ pat’izaeh ka ’ima hara:i’ ray kakrangi’an ’okay pakhopay hi ’oya’. hini howaw ma’ pakra:am ’iyakin Sa’, mina paka:i’ noka tatini’ ka pinayaka:i’ mina sa’owaz a tomal! ’inaz’azem kayzaeh ila, kizaw ma’ hil’awan ka Sinarak lobih koma:at ka kina:at! tani ni ’oya’ ka pinanabih ma’ sa’owaz a tomalan, ’ita’ mina paka:i’ o!

kizaw在寫功課，想到冰箱裡的飲料。但打開冰箱竟然倒了。飲料只剩一點！原來冰箱那攤橘色是飲料打翻了。難怪媽媽說：別把喝剩的飲料放冰箱，若打翻媽媽要花時間清理！kizaw原想拿飲料就走，但想起媽媽的辛苦，就不敢走了。哎！該聽媽媽的話，別把飲料塞冰箱。故kizaw拿抹布依媽媽教的清理。先把冰箱的東西拿出清理乾淨，擦冰箱再擺回清理污水。kizaw細心按照媽媽教的，連冰箱的縫隙都注意了，冰箱清潔又整齊。kizaw因打翻飲料學會聽話的重要。