朗聲四起

asuwa driya, a dawa i, tu kaaekanan kana Pinuyumayan. na rarumaruma i, mipubinian dra dawa peniya. na puwabinian lla aw na llallatudran lla i, tu kiyakarunan dra babayan. salaw kemapadrangal menau dra dawa tu temuwamuwan.

marekamenimeni na dawa. ullaya na milanang, na milanalanang, na midraradrarang, na dremiyaran aw na emudreudrem. ullaya na miludus aw na maresaadr tu ludus. ullaya na mukepel aw na tigaragaras tu buwa. ullaya a puur, a driketran aw a trinapa. nadri na marekamenimeni na dawa i. adri marisarisan tu pauwayan.

na puur i, amau na aekanan kana wawariwari. an maresasiyuk i, tu triyuraw pallu dra maderu. an mekan lla i, drulikitr aw imaran. na llallakan i, maaraaraw kantu drelletr dar.

na driketran i, a sasangaan dra abay na binariyaw. aw na tinaur na bineraberas na inuri dra kudraungan. ullaya pinareuri dra duli aw dra beras demeru. ullaya na niresiyuk dra sinaemay salaw imaran. nadrini i, amau na pakaseberan dra dradrek kema. ullaya tu dawayaw dra tinueraw aw na dineru. tu trai kana tinueraw i, tu uriyanay kana nirudan. salaw ullingull aw imaran. “abalubalu ta lla dra munuma kaisingan ta inekanan.” kema dar na trau na maekan.

na trinapa i, a papakan kana miwawallak na babayan. aw dra trau na paetreng kualeng. asuwa driya, na babayan na miabak na tarepiyallakan i, penadang tu trau dratu aekanan an miwallak. tu ringringaw dra muwaiyu dra saima aw tu apetraw. an miwallak i, tu resiyukaw emenaenay. tu uriyay dra trunga aw tu puateriay dra saima. a pakamakeser kantu dradrek kana babayan na miwawallak. aw a pakasasadru dra asi. an miasi i, ulane aw arekedr tu dradrek kana manuden na semasusu. na trau na paetreng kualeng. na adri makeser maragan i, tu pakanay dra trinapa dar. a pakaarekedr dratu dradrek kema. salaw mingalad idri na trinapa.

garem i, adri lla kadruwan na semasalem dra dawa na Pinuyumayan. an maresiyuk i, marasadru a tinallek. kadruwan a maidrang na sareedr dratu drelletr kana dawa.   

小米是卑南族的主食，有很多種顏色，不同品種有不同功用。蓬萊米種是每天的主食，煮小米飯時要不停翻攪直到煮熟，小孩子都喜歡吃鍋巴！糯米種可以製作binariyaw、糯米飯、酒釀和蒸餾酒。trinapa是專屬產婦食用的品種，產婦吃了吸收熱量、增強體力、增加產婦奶水，讓嬰兒長得結實又健康。久病起不來的病人，吃了trinapa可以增加體力及抵抗力。

現在，卑南族種小米的人不多，主食以米飯為多，有許多老人家很懷念小米鍋巴呢！