朗聲四起

kemay kanta tinakesian kana pallibak na takesian i, ullaya na palaladam paapetr dra paisu. kadru a sinsi a pinutrepa kandri na kiyakarunan. aw demaway dra paariariyan paapetr dra paisu. amau na isuwa na sebang na marasadrusadru aw na mararaemeemetr paapetr dra paisu dratu ikuwaadrini. tu marangeran paladam kanta dra mikakuwayana dra paapetr dra paisu. tu pinaiyar kanta maidraidrangan na paisu i, ta tuludranay kana sinsi. aw tu tilillay kanta tilin na paaapetran. an pallu dra meretra ta i takesian. idru ta pinaapetran na paisu mudruwadruk i, esadru lla. panaan ta parellimaw dra “paradrukaw na karasasa i, esadru.” dratu pauwayan. na pinaapetran na paisu. ta trulltrullanay driya paapetr i yu-ci. maruwaya ta munayun mikakuwayanan dra paapetr dra paisu.

tayta na Yēncumin i, amau ta na kallamallaman na mawnan. an maranger ta kurenang dra trau mimanay i, maumau idru na adriya ta meranaranak dra paisu. ta kakirimaw an maalak ta drata pamamanayan. adriya semudang ta paisu na niyallemes. kadru ta sama na paisu i, ta paapetranay. marayas ta paapetr i, maladam ta lla. aw marekasadru ta paisu. likudran an maranger ta driya temakesi tremulltrull i, kararuwa ta melaesi drata kiniyangeran. mikiyakarunan ta aw kipulibun ta lla i, meladaladam ta drata kallalladraman dra manay driya. aw pukapuka drata kinasaiguwan. ullaya a bati a salaw inaba. kemadri marengay. “inaba na mibati kema ta i, marainaba driya na mikakuwayanan dra inaba.” “a raemetran i, a pukapuka dratu piyamanayan.” amawna, an raemetr ta lla kemuda. an maulid ta emapetr aw ta ranaranakaw na paisu i, kaunaniyan ta dra mamanamanay. kadruwan a trau na mulelep dra bangabangan. aw maaya dra paisu i, emapuaput lla dra, “daw adri ku paapetran ku sama na paisu? daw maulid ku kemiyaanger draku piyamanayan?” kema dar.

llallak ta driya. kemiramiya ta paapetr dra paisu. likudran i, karuwa ta lla mikataguwin. an millallak ta lla aw maranger ta paragan dra ruma i, ullaya ta pinadang na paisu. an maidrang ta lla adri ta lla makeser kikarun i, kadru idru ta pinaapetran. adri ta lla maulep kemiyaanger.

tayta na llallakan. adriya ta matuka. ta druwadrukaw ta paapetranay na paisu. mikakuwayanan ta dra paaapetran dra paisu. likudran i, kainanaba ta kababaawan kadri punapunan.

小學時，學校有實習儲金局的業務，是要學生養成節儉儲蓄的好習慣。畢業時便有一大筆錢，由家長選擇領回，或繼續存入郵局。原住民被認為是經濟弱勢，唯有藉著節儉儲蓄的習慣改善生活，才能繼續升學、創業、實現自己的夢想。

俗話說「命好不如習慣好」、「勤儉才是致富之道」，許多人在急需用錢時，才後悔當初做好儲蓄規劃。年輕朋友們，要牢記並實踐「儲蓄」，相信它會讓你走上幸福的人生。