朗聲四起

nanta kinakadruwan na kanatal i, salaw bulay. miraaraat a drenan. muguwarurus a enay kadri inayan. marekasagar marekainaba na kikaadru driya kadri kana kanatal na trau. iyanabayan ta dradrek. amawna, garem i, marayas ta kiyallengaw dra makadalan emaaraw dratu llubut dra babayan, muka i ing-hang emarawa dra paisu. kadruwan lla a malees na trematrakaw dra manay driya. daw kemadru an kema ta i, kadri punapunan garem. marekakadruwan a trau na semasirep dra miyaibull. na trau na temallam driya semirep kana miyaibull i, adri lla muwai abalu kantu arell. masamasall semirep i, magiyan lla aw madawak lla.

sadru aw marekamenimeni na miyaibull. ullaya na an-huēy-ta-min, na kē-ta-min, na yaw-to-wan, na ta-ma, na ma-huēy aw na hay-lo-in. nadrini na miyaibull i, marisarisan peniya. amau driya semirep a trau i, salaw pakainaba dra dradrek. mikedrang, makeser aw salikesik dratu kiyakarunan. amawna, an uniyan lla tu ibull i, payas maretru. uniyan lla dra kedrang aw adri lla maranger kikarun. an masall semirep i, marebeliyas inaba tu dradrek. idri i, amau na magiyan lla kana miyaibull.

kemaya ta driya kana llallakan na temakakesi. adriya mu milling dratu tamaku dra alialian. adri kiyatuludr ella dratu pinatrekelan dra trau. kaimayay alla miyaibull kemuda. masalla ta driya temuru. adri pararanak semegiw dra miyaibull.

社會充滿了毒品的誘惑，毒品種類多，如安非他命、K他命、搖頭丸、大麻、嗎啡、海洛因等，這些毒品一開始吸食時感覺身心愉快，但毒性消失心情低落、全身無力。毒品會毀壞身體器官，長期吸食嚴重會破壞神經中樞。戒毒比戒菸還困難，甚至進出監獄仍是戒不掉。毒品費用高，許多人傾家蕩產，淪為小偷、強盜或出賣自己。毒販利用學生，引誘他們吸食，上癮後變成下線，替毒販賣毒品，因此不能好奇嘗試。