朗聲四起

semekadr mi lla kandru na pulikudran kandri na takakesian. apetraw ku tratruri, ku tatilillan, ku tilin aw na pakallalladram dra maidraidrangan na tilin. ku abakaw i aliyutr peniya. an abalu ku kemasu muruma i, tu kadradrekii ku kan nanalli. na putabuwan driya. adri ta ababalu kemasu muruma mellisaw. tibus angetrul.

an muwaruma mi kemay i takesian i, ullaya na trau na auka kana pu-si-pan temakesia. ullaya na muka kana an-cin-pan temililla dratu tatilillan. aw mengangara kantu maidraidrangan dra kiyatrebungan muruma. ullaya na mubilin i takesian meladaladam driya. kuyku i, payas ku muruma. adallep i takesian naniyam ruma. driyama, kemakawang ku muruma.

meredek ku i ruma i, retraanay driya ku aliyutr aw pullang ku emapit dra traker. amau driya i, puwari ku lima. menaunau ku kane nanalli dra emaapit dra traker, aw kurenarenang ku. gerem i, maladam ku lla aw arei ku lima lla. pullang ku emapit dra traker pallu dra kakerabian. sabesabay niyam lima aw mukasakasa mi kerabi sarumaenan. peniya mi kerabi i, kurengaway ku driya mellisaw dra kaisising aw demirus ku lla. aw muka ku temililla draku tatilillan. semekadr ku i, ku panauwanay kan nanalli. aw tu tilillay tu ngalad kana pakallalladram kana maidraidrangan na tilin.

an muruma ku kemay i takesian i, sadru ku kiyakarunan i sabak. salaw ku mabangabang. uniyan ku dra wari muka muwadrangiya. kemay ku dratu pinakarun dra maidraidrangan i, meladaladam ku dra pauwayan. “saigu ta temakesi aw maulid ta mututratrau i, kamawan dra miburesukan ta tilin. matreme ta tinakesian. aw maulid ta dra mamanamanay.” kema dar i nanalli pukedrang kanku.

最後一節下課了，把要帶回家的筆、作業簿、書和聯絡簿放在書包，便當盒別忘了帶回家洗。放學後同學要去補習班、到安親班、去課業輔導，而我直接回家，幫忙排荖葉到晚餐時間，飯後洗澡做功課，請媽媽檢查簽聯絡簿。沒有排荖葉時，就去洗便當和襪子、打包垃圾等垃圾車、衣服分類摺好放在衣櫥。放學後我也是很忙碌，從長輩的教導中，學到許多道理。媽媽說：「不要做只會讀書的書蟲，還要學會做人做事。」