朗聲四起

Maraod ko sakapito a folad to mihecahecaan, ira ko tadamaanay a lekakawa no Pangcah “ Ilisin ” hananay, maraod to kona romi’ad, o mitiliday o misiyakayay ato miliyasay to niyaro’ a tamdaw, maemin to pahanhan minokay mikapot tona kailisinan a romi'ad. Tolo romi’ad ko pireko no niyaro’ to Ilisin, sakacecay a romi’ad, Mifiracay han, mitifek misafelac ko fafahiyan mipacok to fafoy ko kapah, dadaya mapolong ko lafi no fa’inayan i talo’an, mingodo to mato’asay, maherek malafi cilosid masakero ko fa’inayan tahira sa i lafii.

Sakatosa a romi’ad tosa ko toki to herek no lahok, matengil to ko radiw no sakiilisin i sopika ato pilekal no mama no kapah micoracor to finawlan tayra i taloan a masa’opo. Palosiden to ni ina kako, salipahak sa kako a tayra i taloan. Iraay ho ma’araw to ako ko takaraway pikacawan no niyaro’, pinangan o niyaro’ no Pangcah. Tahira han i taloan, maemin to ci losid ko fa’inayan fafahiyan ato mato’asay wawawawa, nengneng han ko losid no paytemek sa maliemi’ sa a malikat, sa salongan sa a manengneng.

Misatapang sato i makakayat to ko kamay, keriden to no mama no kapah ko kasaselal a malikoda, o pakarongay ato wawa ikaikor tongod hanto no fafahiyan. Ira ko pati’eciway a tamdaw, pacawien no ’alomanay a milecad ko radiw no patieciway, makakayat mitaliyok ko kalikoda, kako saan i, mafokil a romadiw mafokil a mi’awas, cahocaho fahal pakatoor to kako to ’awas no tao, mafana’ to miperok ko wa’ay, salipahak sato kako ato kapot a masakero.

Saikoray to a romi’ad, mipihay han, deng o fafahiyan aca ko masakeroay, nika no aniniay sato pakayatan a dadaya hanto, onini to ko sakaolah no kapah ato kaying a malikoda.  

豐年祭是阿美族重要的祭典，遠離家鄉工作的遊子都會參與盛會。一大早擴音器播放原住民的歌曲，頭目也會催促大家到會場集合。男女老幼穿著傳統服裝，真是漂亮。開場是迎賓舞，大家手牽手，一人領唱其餘跟唱，配合著腳步圍成一圈又一圈，中午在會場用餐，水煮豬肉、生鹹豬肉、三蘇菜、小辣椒搭配糯米飯是傳統的美食。最後一天為送靈祭，至今已變成青年最喜愛的豐年祭情人之夜。