朗聲四起

Mahecad to cidal ko olah no wina cowa ka’idi patedi to hekal, o painian nira awaay ko pilongoc to sapatikoraw, tonini awaay ko tolas a olah no wina to sakadiheko no faloco’. Ano awaay ko damsayay a faloco’ no wina i, o dengan to o ’edes, tafihaw ato falihenaw no faloco’ ko iraay tona hekal. O  olah ato sida’itay no faloco’ no wina ko safalatfat sanay tona hekal a padiheko ato mapatadengal ko kahirahira no tamdamdaw i tadimocomocokan.

Na hofocen no wina kami sasepat malikaka tahanini, awaay ho ko pahanhan nira, itini i ’orip ni ina metmet han a mitafo malafaloco’ nira ko pitilid ato sakanga’ayaw no tatirengan niyam, cowa kaeca ka misa’imer ko faloco’ ni ina a pidipot to wawa nira, awaay ko patolasan a olah ni ina to romi’ami’ad, i lahad niyam, awaay matengil niyam ko ma:rorayay to kako saanay a sowal nai ngoyos nira.

Oya damsayay makofelay a pising no miso haw ina ato ya ci’ofilay a kamay no miso ina, mitesek a micipat a maparo i kemod no faloco’ ako, inaaw! ina! wata ko roray no miso pahafay a palemed to ’orip i tamiyanan, o roray no miso haw ina, cowa ko mamatawal no mako tahada’oc.

Inaaw! Oya kinafalah hananay no miso ko tatirengan, cato sikolen ko niyah tirengan, awa ko tararikoray no faloco’ iso a mihofoc tamiyanan, mataraw to kacahiwan niyam sai, pakaenen kami, mataraw kasienawan niyam sai, parikoen kami, palahad kiso ina tamiyanan, saka awa:ay to ko kihar niyam a ma’orip, ha:tiniay ko ka’angongol no olah iso, samaamaanen cowa ko mamafilo a papaco’ay to olah no miso tamiyan.  

Hatini sato i, maliteng to, caho kaparo ko paco’ay to olah to wina, maliteng to pakadofah a pahafayen no ina ko ’orip i kitaanan, cowa ko cecay aca ko piahowiday no faloco’, saka kafana’ kita a mingodo to wina ato wama, mala o sanga’ayay makapah ko waywayan a wawa, aka ka pihaiken to palatamdaw ato nafaloco’an no wina i kitanan.  

Ano ira ko romi’ad namatayal i, kalalok minokay a miliso’ to wina, hololen a pacafayen ko wina a nimaaman, anca keriden talacowacowa a misalama, o sanga’ayay a sapaco’ay to olah ci inaan konini.

本文表達了對母親深深的感謝與敬愛。母親無私如太陽，不求回報地給予溫暖與照顧，讓家庭充滿愛與關懷。回憶母親從小辛勤照顧四個孩子，無怨無悔地付出，即使辛苦也從未喊累。母親粗糙的雙手和慈祥的面容深深刻印在心中。隨著年齡漸長，體會到母親的偉大與辛勞，決心珍惜母愛、孝順父母，並希望多陪伴母親、讓她感到幸福。整篇文章充滿溫情，展現出母愛的偉大與子女對母親的感恩之情。