朗聲四起

O makesemay ato lipahakay a tamadaw masaroma ko miharatengan,  roma sato deng o patosokan no faloco’ a cecay. O mararomay ato lipahakay a pinangan, O sakaketon no faloco’ ita a midoedo to halalan no demak ato ’icel, o tahada’ocay ’angongolay ko pifiyor to ’orip no mita, o sakahatini no harateng, o nano ka’oripan i kaemangan ho a pinangan.

O mitiliday ato widang ko kasasiwatid nona kalakesemay ato lipahakay a harateng. Ira koya mitiliday a tatosa, tatiih ko piseking nangra. “ Awaay ko taneng ako, samaamaanen a misa’icel i, cowa kafilo ako ”. Sa ko piharateng no makesemay a tamdaw. “ Cowa kaemin tilid no mako ko misekingan, ano miliyaw miseking sainanengen to ako ”. Sa ko  piharateng no lipahakay a tamdaw.

O pisimsim no maomahay to ’orad no kacagnlahan i, “ O mamaponi’ no ’orad ko lamit no nipalomaan, maponi’ ko heci ”. sa ko harateng no kalikesemay a tamdaw. “ O mamafaresi’ no ’orad ko nipalomaan, makapah ko heci ”. sa ko harateng no lipahakay a tamdaw. “ O patademan aca ko mamasanga’ no mako tona hadhad ”. saan ko piharateng no kalikesemay a tamdaw.

Ona kaliraromay a harateng, nga’ayay to a falicen ko faloco’ ano makahi kita, pasayraen i moecelay ko piharateng i, o caciepoc kita to lipahakay a pinangan, pakayni tona pinangan i, maolah ko cimacima a tamdaw misawidang a mapalemed haca. Ci widang to lipahakay a tamdaw i, mapadahof kiso to moecelay a harateng, o sakaira no sakanga’ayaw no ’orip kona masamoecelay a harateng. Ira koya tadasowal to mifalican no faloco’ ko harateng, mafalic no faloco’ ko waywayan, mafalic no waywayan ko kananaman, mafalic no kananaman ko pinangan, mafalic no pinangan ko rakat i ’orip. Saka, ano sapifalicaw to rakat no ’orip, ka’ayawen a mipatadek to nafaloco’an.

Saka kita anini o kapah no Yincomin, safaelohen a misaday ko faloco’, sa ’icelen a misai’ayaw a madadengadenga to sakaci’epoc, malacecay ko faloco’ no mita malapainiini to widang i sakarihaday no ’orip.

說明悲觀與樂觀是由生活環境、家庭背景和教育等因素所影響的思維方式。文章以學生、農夫和工人的例子，對比悲觀與樂觀者面對相同情境時的不同看法與反應。悲觀者容易放棄、看到困難，而樂觀者則會從中尋找希望與解決方法。雖然思維方式受環境影響，但只要願意改變，學會正面思考，就能培養樂觀個性，進而影響他人並創造更多機會。文章鼓勵大家成為積極樂觀的人，擁有正向力量。