朗聲四起

O Taywan hananay i, o kalomahadan no mita. nga’ ayay ho “ O ’Amis ho kako, ” sa ko sowal no mita no hatini, ka ikol to i, nga’ ay ho “ o ’Amis kako. ” han ko sowal? Itiya ho o mitiliday ko akong ako to no Dipong, mafana’ misano Dipong a caciyaw. Mahapinang i kimad ningra ko waywayan no Dipong, ano o sowal to, o ’orip to, mahecad o Dipong ko pinangn nira; mansa saroma sanay a nengneng ci akong ako, ano o ’Ami ’amis ko tireng ningra a mahecad ci fofoan i, sasiwatid sanay ko pinangan nira. Ya i’ayaw ho i, mahemek kako to kaidahi ni akong ako, malalokay kako pahiyo to kapot to kafana’ no akong ako caciyaw to no Dipong; ’araw han i, o ma:raraway ko hatiniay a harateng.

Masalamit ko serangawan no mita itini tona Taywan, mirayray kita to taneng no liteng ita, ka mapalakisaway ko caciyaw no mita, mapalalang kita misano ’Amis a caciyaw, mapatangic kita minanam to sowal, likisi ato serangawan no tao. Pina to ko kafafalic no citay, oyanan to a mapacieci kita a milayap to sowal ato serangawan no tao; layap sa ko akong ako tona no tao, misarikecan ato mipakafana’an nangra, kao hatinien no mita a mitoor haw? itini tona citay no mita, samaanen no mita misi’ayaw ko rayray no caciyaw ato serangwan no mita? “ Cima kita? ” han milicay ko roma a finacadan i, koengelay paca’ofen kona licay, kawrira o karawrawan to no Yincomin kona licay to “ cima kiso? ” sanay.

O ’Amis kako saan kako, mafokil kako a caciyaw i, o ’Amis ho kako saw? ’Ano awa to ko sowal no mita o ’Amis i, nga’ ay ho “ o ’Amis kako. ” han ko sowal haw? o Yincomin kita sa i, o no kowaping aca ko kafana’an a caciyaw? Saka, o sasi’ayawen no mita koninian a demak, cima kita? Samaanay ko pihapinang no miso to serangwan ato ’orip no mita. 

探討了原住民文化與語言的保存問題。提到自己生長在台灣，並自豪於是原住民。然而，隨著外公接受日本教育，並且在新的政府下，原住民的語言和文化逐漸被同化，對自我認同產生困惑。反思自己已經幾乎忘記了母語，並質疑如果無法說自己的語言，是否還能稱自己為原住民。文章表達了對文化認同的迷茫與焦慮，並強調教育在塑造個人思想中的重要作用。最後，表達了希望能夠在未來勇敢地說出「我是原住民」，並強調這需要每一代人的努力與實現。