朗聲四起

adiyu diya, nu maranger ta parahan da ruma’ mu, karuwa sa’ami nu paadang ta. mukuwa ta diya i henan maya’a da kawi da taturakan, da vavaratan. nu acevung ta mu, ta pudungay di, marepadaulr ta da niruma’enan mukuwa mateka. nu adalrep lra mu, ta kasayasayayaw pakedeng da hung. nu adawilr mu, ta palra’udanay kana danum. nu veciliyan mu, makiteng na danum i dinanuman di, maruwa ta pada’ulr na kawi di na ’uway diya.

nu piya ta paladuk data pararahanan na eman diya mu, demaulr ta lra da ma’inayan i dekalr. kipulralrang ta parahan da ruma’. na vavayan mu, mukuwa kilavuna, mukuwa padanga datu aekanen di cacekelan nadu na kiyakarun. nu pararahanan ta, nu semasa’uv ta lra mu, duwa sadekalran na cau pulraalrang. ulra na cemacekav da vasikaw, ulra na venavetu’ da lavun, ulra na tematulud da ’uway. salaw misa’ur na rinuma’enan.

piya ta lra sema’uv mu, meliveng ta kana sinasedesede’an. ulra na kiya’edengan, ulra na sawka, ulra na alili, ulra na kuvaw di na pupalidingan.

adiyu diya mu, miliveng ta kana tinulikan na vasikaw. na vasikaw mu, ta pace’elray da lavun i makapacaran. likudan lra mu, tu ca’i kana hung na vekavekal diya, na tinevetevan na daramiyan di na lralrikic na dare’ mu, ta pudanumay di ta inu’aw, ta deliyanay kana vasikaw i liveng. salaw areked di adi makaud da ’udalr.

nu pararahan ta da ruma’ mu, melri tu kedang kana miyaruma’, tu niyalimayan tu kedang da sadekalran, nu i eman na pararahan da ruma’ kema ta mu, mau na sadekalran na karadikedikes, karapulraalrang, semalra nu muwasavak ta da vekalan da ruma’ mu, semasaharan diya na sadekalran di na maresa’ur na ma’a’idangan, pakasemangal di penalisi semungal da temuwamuwan.

nu parahan ta da ruma’ harem mu, salaw ta kalre’ayan, ta pakarunay kana micepa parahan na cau di, tu parahanay ta da ruma’ na areked di na vulay, ta pucima’ay da paisu, muasaasalr lra a kakuwayanan harem, salaw ta sare’ed kantu kakuwayanan na pararahanan da ruma’ adiyu diya.

早前蓋房子，大約要花一年的時間備料。材料備齊後，部落的男人幫忙蓋房子，女人割茅草，準備食物和飲料。蓋屋頂時，整個部落的族人都動員起來。蓋好屋頂，準備房間的隔牆，有臥室、廚房、穀倉、倉庫和牛車庫。牆壁是用竹片交叉架起來的，外面再覆蓋茅草。用新鮮的牛糞、切細的稻草和黏土加水混合成泥狀，砌在架好的竹牆。

蓋住屋不是主人家單獨進行，是整個部落族人共同完成，所以新屋落成時，整個族人親友齊歡慶，並分享喜悅。