朗聲四起

O olah no ina to wawa, malecad to tedi’ no cidal awaay ko madapoay. O pidipot no wina to wawa, cowa pisaali to sapacoay no wawa. Tada mapadiheko nira ko faloco’ no wawa. Ano cowa kainaneng ko wina a midipot to wawa i, cowa ko nganga’ay ko ’orip no wawa. Ano awa ko olah no wina i, safalihenaw sanay ko faloco’ no wawa, sienaw kitec sanay ko faloco’ no wawa. Itini tona hekal i, o dengan o olah no wina ko mamipadiheko to faloco’ no wawa. Malecad to pikihecod no cidal mipatedi’ to maamaan ko olah no wina, awaay ko masawaday.

Nahofocen ni wina kami a sasepat, awaay to ko hanhan nira a midimokos tamiyanan. To romi’ami’ad, mitangtang to kakaenen niyam, mifafaca’ to riko’ niyam, mihamham haca to pitilid niyam. Adada sa kami i, misalafiifii to ko wina mifafa paising tamiyanan, awaawaay a matengil niyam ko sowal nira to marorayay kako sanay a sowal.

Ya kaepeday a pising ni wina, ya mafetoay a kamay nira, o roray nira kora a midipot tamiyanan, cowa ko mamatawal ako, cipat sanay i faloco’ ako ko olah no wina i tamiyanan a sasepat o wawa. 

Lomahad sa to kami anini. Miahowiday kami to pidipot no wina i tamiyanan, saka mitengilay kami to sowal no wina. Inanengay kami a mitilid, maomah, cowa pipalahedaw to narorayan no wina ato pidipot, pariri’, pakafana’ nira i tamiyanan. Ano ira ho ko romi’ad i, minokayay kami a miliso’ to winaan. Ataen niyam ko wina talacowacowa a misarakarakat. ’Acaen niyam ko kaolahan nira a riko’, kakaenen, malacafay a komaen. O sakakaay a sapacoay to olah no wina ano haenen ko waywayan.

表達了對母親深深的感謝與敬愛。母親無私如太陽，不求回報地給予溫暖與照顧，讓家庭充滿愛與關懷。回憶母親從小辛勤照顧四個孩子，無怨無悔地付出，即使辛苦也從未喊累。母親粗糙的雙手和慈祥的面容深深刻印在心中。隨著年齡漸長，作者體會到母親的偉大與辛勞，決心珍惜母愛、孝順父母，並希望多陪伴母親、讓她感到幸福。整篇文章充滿溫情，展現出母愛的偉大與子女對母親的感恩之情。