朗聲四起

sayhu venavati i mulri na ma’inay. marayas ku kemayan i sinulevan kana kawi kinger zatu vativatiyan ni mulri na ma’inay. sazu atu kinazalram na kasahasahar na markamelrimelri na vati. ulra na kalikeliked, ulra na kalramalraman, ulra na kasemangalan. vi’as na wari harem mapuanger ku a mari’ami a derun azu, i mulri za i malri muruma’ kemay i ’uma. muruma’ mu melak za lipad mukuwa kuresasuleva kana tu sinulevan na kawi, inku mu melak ku za ’a’awan pa’aw kani mulri na ma’inay. “alra rengay ziyan za vativatiyan imu a!” mudalrep i wadilri na ma’anay kaniyam maranger kinger za vativatiyan. marengay i mulri, “ulra a saya vativatiyan a kirepauwa pakazalram kanmu marengay za ’azi ta mararatrang nu kiyakarun ta. zi vavati ku harem.” kema

a awatr ziya kazu a marepulrakarawan mukuwa kana tu ’uma na vu’ivu’ir lrematuza, kana vi’as na wari mu, na ma’inay temudu’ i tengatengalr za sarakazan za kawi, “ kaya ta i kaziyu kana sinulevan kuresasuleva a! ” kema zi, mukuwa i makalusu kana kawi kuresasuleva.

maw mu na kadaw atu ipasasenan mu, mutrapingiran lra, zi na sinulevan mu kazu lra i saninin kana tengalr, mukuwa nazu i makalusu kana kawi mu, ’azi maruwa kuresasulev kana tu sinulevan izu na kawi.

kemazu mu, izu na vavayan mu, kemania marengay kana ma’inay, “raip! eman zi nu kamawan ta za haramhaman maruwa muiyaiyan mu, salaw ta uri kalra’ayan wa! zi karuwa ta mukuwa i kaziyu kana tengatengalr kursasuleva!” marengay na ma’inay, “tatena’ u mu! nu kemazu mu, kemania ta nu kemazu, nanta tapelru mu ta pareputaw mutukazuwa zi ta seredekanay kana ta tranguru’ za uri watuaeman ta.”

nazu mu tu pareputaw nantu tapelru zi tu seredekanay i tranguru’ kemawan za tu su’ang za takulris zi mututakulris lra nazu na trau.

kana mena’u nazu za tu zazek za mututakulris mu payas mazakezak zi rarengay za eman kema zi pulrengaw mu “mi! mi!” kema maruni. tatena’ mutitakulris lra nazu na zazuwa.

nu mukuwa ta kikaruna mu, saya ta anger, pakunamun ta kipiyayaw ta kiyakarunan, ’azi ta puredadariw piangeraw na iniyan za ’inavayan kana ta kiyakarunan.

夏天祖父喜歡坐在樹下。我請阿公講故事，弟弟也來聽。祖父說：「有一則故事很適合講給你們聽。」以前有對情侶到山上的芋頭田裡去除草，因為天氣太熱，於是他們到樹下去納涼。但因日光斜照，樹蔭在山崖的另一邊，他們依然沒有遮蔽。

這時候女生說：「如果我們能像動物一樣，我們就可以到那山崖的樹蔭下了！」男的說：「我們把除草的工具弄成兩半插在頭上，看能像什麼。」他們把工具弄斷插在頭上，結果工具變為羊角，人也變成山羊了。