朗聲四起

O sakakaay a likakawa a lisin no ’Amis a finacadan, i O kalikoda. oya miliyasay to niyaro’ tayra i tokay a matayal to saka’orip i, cuwa kaeca ka pinukay mikihatiya to no kapolongan a sa’opo.

Toloay a romi’ad ko pidemak to likakawa no niyaro’, i saka tosa a romi’ad ko tadamaanay a hadademaken, pacerem to mipahongsang to radiw no Yencumin, micaco^colay heca ko kakitaan to ’alomanay patayra i sefi a masa’opo. Patadoen to no fafahiyan a fufu kami paca’edong to lalosidan no likoda, salipahak sanay to kami tayra i sefi.

Tahira sato i sefi cica’edongay to a ma^min to no rayray a lalosidan, o fa’inayan to, fafahiyan to, malitengay to, o kaemangay to, makapahay a ma^min ko kacica’edong to sakalikoda a lalosidan salamitmit sa matedi.

Pisatapang i o sapilitemoh to lafang a kero a makakiting to kamay, keliden no midi’eciway romadiw, ta patoolen no ’alomanay mihecad a paradiw, patatodongen to hawang a masa’ilaw’law paperok a mitaliyok,

namafokilay ho kako a makero ato romadiw to likoda a radiw ato kero. kinapinapina mihecad a patatoor to sakatatodong no radiw, fana’ayto. mikihatiya to ’alomanay mahemek a misata’angay to radiw tadalipahak ko tamdamdaw.

Kalahokan i, mapolong ko lahok i sefi, nifalawan a titi no diyong, pasirawan, rokot, kangangiway, pasikaen han to hemay, ono ’Amis a pinangan no rayray a sanyaay kakaenen. o sapi solinga’aw a milahci tona toloay romiad a pidemak, tayraay i ’alo ko kapah a mikesi’, pakaen ko malitengay to nikesi’an nangra a futing, ta masolinga’ to ko pahalekan.

O sowal no wina ako i, iraay ko misakapotay a pinangan no ’Amis a finacadan sanay, kihecud no rayray a lisin, ato samanen ko pidemak, tengilen ho ko pihayda no kakitaan no niyaro’, nga’ patoloden ko kapah midemak. panta:ay ko kafana’an ako to kiloma’an a likoda,  orira to a cuwa pasera’ ko kero ato radiw. O nano rayray ho a ka’oxitan ko sikaen, maolahay kako to kawaho no acang no niyaro’, mapatedal mapafaedet ko faloco’, o cuwa ko mama’aca no payci ko tadaso’elinay a lipahak.

豐年祭是阿美族最重要的祭典，離鄉族人皆返鄉參與，為期三天。清晨播放原住民歌曲，族人在頭目召集下換上傳統服裝齊聚會場，男女老幼盛裝出席。迎賓舞由領唱者帶領，眾人手牽手圍圈歌舞，氣氛熱烈。中午共享水煮豬肉、生鹹豬肉、野菜、辣椒與糯米飯等美食。最後青年到河邊抓魚奉給長者，象徵祭典圓滿。豐年祭在嚴謹的年齡階級制度下進行，充滿歌舞、美食與真誠情感，帶來難得的快樂。