朗聲四起

a sicuayan a qinaljan nua se paiwan, namasan pazangal aravac a qiniladjan nua pulingaw, a pulingaw maqati a pasasedjalu tua caucau kata naqemati a cemas kata i selem a marka tja vuvu, aicu a pulingaw avan a pakeljakeljang tua varung nua cemas kata kai nua caucau tua cemas.

a sika na masan pazangal aravac nua marka pulingaw i qinaljan, ayatua a pulingaw paljavak tua kina i kacauanan nua macidicidilj; kemasi tua sipualjak, a saqetju nua caucau, semu kuya semu paljiq, kisenai tua kina i kacauanan kata remukuz a pasa selem, neka nu inika kinicapiljan a pusaladj nua marka pulingaw tua timaimanga a caucau.

pai avan a sika namasan pazangal aravac a sengsengan a peniliq kata temulu tua seman pulingaw; a patagilj tua peniliq tua pulingaw kemasi tua kinacemkeljan nua kapulingavan a marka vuvu anga a pacun, tu izua a uri  sedjaljep a piliqen a seman pulingaw, izua nu pacun uta a piqinaljan tua uri sedjaljep a kisan pulingaw a vavayavayan a maqacuvucuvung.

pai a pinenetj a uri sanpulingaven a vavayavayan, izua pinakisumalji tua sitavakan tu kisan pulingaw, inika maqati a pumaya a pacacikel i katjuruvuan i ta inika kinatavakan a kadjunangan; sipiliq uta tua kakanen, maru ka tjaukaizua a padai a kakesain i qinaljan, inika maqati a pakanan a uri masan pulingaw a caucau tua venli a kemasi pairang a padai, inika pakanan tua namacai anga kakanen a sacemel. azua pakitulutuluin ta pulingaw a maqacuvucuvung a vavayan kidjadjaladjalan nu kipusengsengan a pulingaw. lajkua nu vilivililjan anga nuri lemingdjen a seman pulingaw, pakivadaq anan a sema zaqu tua naqemati a cemas kata marka tja vuvu.

傳統的排灣族社會中，靈媒是部落文化重要的資產，在因為靈媒會參與每一個人一生中的生命禮儀。靈媒的選定與培育，在部落是重要的工作之一。從小被預定為靈媒的少女，有特殊的培育過程。食物的取用也有選擇。平常長者靈媒工作，要隨側學習協助。要封立為部落正式的靈媒，要藉著靈媒手中的靈珠，求問造物神與祖靈允許而成。靈媒個人生活必須謹慎有序，為族人解厄、為部落消災、醫病、通靈、占卜等等，建立健康與安寧的部落生活。