朗聲四起

U cinglaw nu suni nu piletaduhay i sangsangdeb, lingatu sahen a sisuni marahid, araw sarumaruma satu ku nipiangang, a mikilim tu kapahay a nipangiha nira. Tangasa saan i nikasadak nu bu’ is, araw saalesu satu ku ngiha.  Ira malalukay a mawmahay, mitamurung tu tatak a mina’ untu a taluma’, sadak sahen ku cidal i umaumahantu a mawmah, tahecerem tu tiya na’unsa a pahanhan a masatuku a dademak, tu sapakakapah nu ’urip nu luma’ay.  Anu malitemuh i taritaringan i, caay kanca kasasuini tu sakalemed a suwal, ta pabana’ aca tu sakucila a demakan, mahaen kiyaru kira kapahay ku balucu’, dihemayay, bangcalay a niyaru’.

Masadaktu ku bulad, ira sariwsiw nu bali, ira nikacelak nu baru, sabangsis saan i umaumahan, na makayra i dadahalay a rengurengusan. Kalamkam kalamkan ku radiw nira piletaduhay i cuwacuwatu nu umah. U wawa nu niyaru’ malingatu tu a milicang tu tipus, misalama a mabekac i putal, u matu’ asay hantu i, maru i sikal a masasuwal a makakungku. U limucedan hantu i, miyalatu tu rinum a mita’is tu buduy, u ruma satu kamayen a mibuheci tu malicangay a tabiras, mahaen ku ’urip nu i niyaru’ ay. Maanen naca kalamkam ku rakat nu tuki, tangasa satu i terung nu labii’ caay tu kapihaceng ku suni nira piletaduhay, araw malasawad caay tu katengil. ira bulad hantu i, sana’un satu a talesasa a malasawad, mahaen tu ku nika awaay nu tekiteki aca nina pa’ uripan, ta mabuti’ tu wamin ku tamdaw, u tipus satu ku i lanu’ay nu bulad a masalaing.

Caay hen ka tanengal malingadtu ku mawmahay a mibaba tu sakamawmah a malingad, tanuluwi saan a maaini tu ratar, a malingatu tu a dademak, sana’un saan a marekuku’ ku mainayan, tiya sadak saan ku makawaliay a tanengal, caay katenes tahekal sa kira bangcalay a calamay, dudu satu kira masalamalay a cidal a tahekal, samelimelicsa ku ’ul’ul a mapacidal. Malingatu tu ku niyaru’ a cingelaw, i lalalalanan tu ku micudaday nu niyaru’ a maruyaruy a micudad, ina remi’ad nu niyaru’ i, u cingelaw a masasuwal atu kemut a nipakatawa kiyari nu micudaday a malingatu. Sisa awaay ku engiengiw nu labii’ i niyaru’.

描寫農村的黃昏與夜晚，從蟋蟀的歌聲、農人回家的身影，到部落中人們的日常活動。黃昏時分，蟋蟀的歌聲由低沉轉為柔和，農人們在田間相遇互道祝福，月光下的田野散發著神聖的氣息。夜晚，部落的孩子們在曬穀場玩耍，大人們休息並忙於家務，婦女們修補衣物或處理玉米。深夜時，世界逐漸安靜，蟋蟀的歌聲消失。黎明時分，農人們再次出發工作，部落的日常開始，學生們也陸續前往學校，帶來了新一天的生氣與熱鬧。