朗聲四起

Matiya u cidal ku ’ulah nu wina awaay ku tarahad, u nipidemak nira awaay ku panukasen kaku sananay, ira nipakadihemay i titaan, anu awaay ku mahaenay a wina i, hacuwaay hakiya ku nika lietec, nika awaay ku pinang, sisa u ’ulah nu wina a cacay kiyari ku pacidalay tu dihemayay a cidal i liyut nu kitakit. Tu sapidiput aca tu cuecuedan atu karikarimucu’ an nu pa’urpan nu tamtamdaw.  Na makayra i herek a masubuc i tamiyanan a sasepat, awaaytu ku riharayay a nika ’urip nu wina, tu saremiremi’ad a midiput, a misimaw a sidait aca i tamiyanan. Lihalaw aca tu sapicudad atu sakakapah nu tireng nu niyam. Awaay ku nikatengilan tu ngeru’ sananay a suwal nira, ira dihemayay a pising, atu matiyaay u tawasi misacerkay a kamay, i balucu’ nu maku, caay kaw kapawanan nu maku, mahaen ku nikangeru a misimaw a nidiput i tamiyanan, u demak nu wina namakayni i kaying hen cira, tangasa i nikasubuc i takuwan, pahabay, pasubana’ atu awaay ku nisimsim tu demak nu tireng a misacudacuday tu demak nu luma’, tu sapakacaay kalihalaw , kasida’it nu nika’urip nu niyam, a maanen hakiya a panukas a palulul kira nangeruan nira , sisa i balucu’ nu niyam, a maanen henay a malasawad , awaaytu ku mikikakaay tu kapah nu wina.

Tangasa i matini araw tataaktu, matu’as tu wamin kami, u hemek niyam i ci inaan, pakay balucu’en tu nu niyam, sisa pihaceng kami a milisu’, a hina taluma’ a mimelaw i ci inaan, ruma satu anu silawad tupinen tu nu niyam a patahekal a misarakarakat a talacuwacuwa. A mihulul tu sakacaay ka ‘aniw’iw nu wina a cacay i luma’, sisa hakulung han nu niyam a tahekal tu sapiaray tu nidiput atu nikangeru’an nu wina a mitu’as i tamiyan, anini satu hinapacabay kami a misarakarakat i ciraan, anu silawad ku cimacima nu niyam a malekaka, caay kanca kataluma’ a pacabay tu wina. Caay kabukil hacuwa ku ngeru’, hacuea ku sida’it tu wawa nira sakiyari kami a malekaka, turuma satu u pasubana’ay aca kami tu wawawawa, nacima ku pahabayay , nacima ku mitu’asay yu sananay kiyari. Patinaku aca tu sapanukas tu hadidik nu nipahabay nira tangasa i nikatu’as i nikakapah nu saka’urip nu wawa nira atu sun ayu sananay a pabana’ tu balucu’ nu wina.

讚頌母愛的偉大與無私，以太陽比喻母親，強調母愛帶來的溫暖與支持。母親無怨無悔地照顧四個孩子，辛勤勞動、默默付出，不求回報。漸漸長大，體會到母親的辛苦與恩情，並表示要懂得感恩與孝順，珍惜與母親相處的時光，以實際行動回報母愛。