朗聲四起

Tiya ratar nu da:bak, sacacay saan a miala tu elun a misu’ayaw tu putal a maru’ i panan, awaay ku cabecabeng aca. Iraan sa u apuru’ ay a titic ku nisarangatan, matiya u sacacay sanay i tini a ma’ urip, awaawaay ku i teparay a pacabay a ma’urip sa’uya’uyaan, salipahak sa a misiwatid, satukusa a maekek a mimelaw tiya dabakay a calamay, ira nikasumad, sani iraay, sani mingata a mananuwang sabangcal saan. Matiya i kakarayanay kira nikariharay a ma’urip.

Caay kate:nes masadaktu ku cidal na maka sawaliyan a sasedaseday saan a patanengal, besucsa a awaay ku cahit. I matinitu a masapinang ku lutuk i sawaliyan, ira nika salangdaw, bangcal nu kilakilangan, pakadihemay sanay tu balucu’ nu makamelaway nu nimanima. Sabangsis saan ku sadak nu sanek nu kilang i kakarayan, sulikul han mamelaw kira Siw-ku-lu-wan-si ini:tu caay piraay, satalikul han naca a mimelaw, ira kiya sa tanektek, sa tarakaw sananay a Cung-yang-san-may, matiya u nikulitan i aayaw. I mucerem nu sangsangdeb a kakarayan, salangdaw saan awaay ku kutem nira kakarayan, i matini dengay hen a makamelaw tira makasasaay a mabaher a palang, a misaliyuliyut i kakarayan. U pasubana’ ay tu tamdaw tu nika kapah nu ’urip i Ta-ce-rang.

I herek nu nikalabi, caay kanca pisalamal ci baki, tu sapisangiru, sasilsil sa amin i aayaw nu ngiru a mitengil tu kungku ni baki, atu demak i ayaw nu niyaru’. I matini satueman satu ku labii’ nu niyaru’, katalawan saan kira ni katerep awaay ku engiengiw aca nu suni’, melaw han ku tuki i waluay henay, ira na’ un nu remiad, bahal sa a padihemay tu balucu’ atu riharay nu tiretireng nu maku.  Sulinay ma’ulah kaku tu mahaenay a ka’uripan, dengay a misamaama:an a midemak a milaheci tu kangalayan nu tireng a misanga’ a minanam . awaay aca ku mi’uteray ku milalangay tu kangalayanay nu tireng a dademaken atu sasanga’an . sisa pihaceng ku ’ ulah nu maku tina mahaenay pakalipahakay , pakariharayay a awaayay ku micaradaway , milalangay atu awaay ku cingelaway nu tamtamdaw atu tanu suni’ sananay a karireng a ka’uripan.

在部落中度過的一天，從清晨到夜晚的自然景色與生活氛圍。清晨時，坐在門前廣場欣賞晨霧與日出，感受與天地融合的自由與寧靜。隨著太陽升起，晨霧散去，山脈與樹木展現出秀麗景色，令人心曠神怡。黃昏後天氣晴朗，偶見老鷹飛翔，晚間圍火取暖、聆聽外公說部落故事。夜晚雖寂靜甚至有些怕人，但整體的慢節奏生活讓人深感放鬆與喜愛。