朗聲四起

i kanihalan nu cacay a demiad, caay henay ka takelal, matabal kaku sasielun sa a tataytay mueneng, zahkez sa ku balucu’ mueneng nuayawan nu panan a putah, pasuayaw miazih tu kapah nu kaluhicahica. nayi’ ku langat i nu ayawan, uyza dada puenelay henay a kilang. itawya kasenun sa mahiza u nihulakan ku ba’ket nu uzip aku, taneng a pakuniza han tu ku nizateng. haymaw han miazih kya culil nya uul, zayhan sasangelac sa kya liwliw, u zuma batad sa u zuma capi sa, mahiza tu u muenengay i pabapabawan ku uzip.

caytenes, muculaltu ku cilal nay wali, takelal satuay, macuzuh tu nu edil nu cilal kya uul amin lawpes satu. zikuz uyni tu u ngazu sa ku langdaw a kilakilangan atu landaw nu lutuk ku i mataay, milihiza ku balucu’ manamuh limulak, asu’ sa helupen mahiza u baluhayay a bali talabu i uzip nu maku. suzikuz han maazih ku sa’wac, tazikuzikuc izaw aca maazih ku talakaway a buyubuyu’an.

caytenes, culaculal satu ku malukay a sinimuku amin ku heni tu sakaluk paytaling a muculil, tanuliha’ sa amin tu kalalicay malanamtu sa, a malingatu tu ku kawaw nu ayzaay a demiad. zikuz satu nuyni, azihan ku tapuku izaw ku sazumazuma sananay a ladem, belabelat sa ku lutuk i taling mapaeceng nu cilal, azihan u lesing kuyza.

kapah ku demiad ayza, satakelal sa ku tapuku, atu mahizaay u nipacaitan a ladem i tapuku, izaw aca ku paysasa hananay mubahel a palang. matengiltu ku alawaw nu niyazu’ay, culaculal satu ku muculilay a micudaday i zazan, atacacudadantu, tacacudadantu ku micudaday milihiza malingatu tu ku katatawatawa nu niyazu’ay.

manamuh kaku tu sazahkez hananay, cay kaalawaway, atu matumesay nu namuh a niyazu’, zayhan sa, limulak kapah ku balucu’ nu maku, kyu manamuh mihalhal tu anucilaay a demiad.

 

有天清晨，天還沒亮，我看著前方的景色有種無拘無束的感覺。早晨的霧氣白茫茫一片，有如仙境。太陽從東邊升起，晨霧散開，清翠的樹林和草地盡入眼中，讓人看了心曠神怡，空氣中有一股清新的感覺。往後看小溪就在不遠處，再往後看些就是雄偉的高山，農人走在田埂上也開始工作。蔚藍的天空，掛著朵朵的白雲，許多老鷹在低空盤旋，學生走進學校，部落變得熱鬧。我喜歡悠閒、寧靜，富有人情味的部落，每一天都期待著明天的來臨。