朗聲四起

zateng sa, u makesemay a tademaw kaku hakiza? caay sa u limulakay a tademaw kaku hakiya? makesemay atu limulakay a tademaw sa tungusay u nabalucu’an a nizatengan, mahiniyay a nabalucu’an a nizateng sa tanengay sapiketun tu sasakawawen atu sakalatademawaw a wayway, payni tu nu maku tabaki ku nika sumad nu uzip. sakaizaw nu mahiniyay a nabalucu’an a nizateng sa u nay lalabuay tu nu luma’ atu babalaki ku sakasumad, nay adidi’ay a piernengan a liwliw, luma’ atu lalabuay nu luma’, nicudadan atu u nisacabayan a cabay, tini amin i labu nuyni ku sakaizaw nu nikahica, natusaay tabaki ku nika caay kalecad nuyni, anikasasubatadan.

izaw kya tatusaay a micudaday caay ka kapah ku mitanengan nuheni, hini sa kya makesemay a micudaday, nika caay tu kataneng nu tineng nu maku sa ciniza, hicahicaen misaicelang caay henay kakapah ku nitaneng, naynayi’ tu ku piazih niza cinizaan tu. uyza satu limulakay a micudaday zatengsa ciniza akay u nika caay kataneng nu maku miazih tu cudad? patatenga’ kaku a saicelangen tu nu maku miazih tu cudad, anu ayaw pitaneng sa a kapah tuway ku nitanengan nu maku, hini sa kya makesemay tu, anu mahini tu ku udad a mamuni’ ku lamit nu nipalumaan sa ciniza, a masazuma tu ku nilangec, salangiwngiw sa kuyni makesemay. uyza satu ya limulakay a malukay, hini sa mahiniyay ku culil nu demiad ahicaen, u sakakapah tu nu lala’, taneng henay pahanhan ku canacanan, pahanhan ayza kapah misulimet tu sasulimeten, kapah henay mipawyang tu sapisakawaw a tuutuud.

caay kakanca taneng masumad ku nabalucu’an a nizateng, a maydih masiwaz ku balucu’ nu masakapahay henay sa, bililen simayza tu nu patelekay a nizateng. a mahini kanca mabalic mala u limulakay tu a tademaw, sisa izawtu ku sasacabayen atu nipasepi. ka u mahiniyay ku sasacabayen, tini a izaw ku sakatineng a mapaicelang. mahiniyay pabesucay ku balucu’ a nizateng ku misanga’ay tu hahalhalen, izayhan sa, tanengay ku nabalucu’an misumad tu nizatengan, nabaluca’an ku misumaday tu sapikawaw, misumaday tu wayway, anu maydih kapah ku kauzip sa, kapahay sa sumaden ku nizateng. adasay mala u limulakay tu a tademaw kita amin.