朗聲四起

u adingu maydih tu cilal. u adingu maydih tu bulad. u adingu malecad tu mitizinaay, sani inuayawan, sani inuzikuzan milimek. patelatela’ kaku, patelatela’ ciniza; mutukud kaku mutukud ciniza.

kalahukan inayi’ tu, malecad tu miliyasay i takuwan, mihica kaku, mahiza tu. adingu, anu i cuwacuwa, miladay i takuwan. hanca nayi’ ku uzip nu adingu, nika izawan aku kyu misamelit. painging i cilal misangelu’ malalukay a tademaw, makaydih tu adingu niza; mikilidungay a tademaw, caypakadih tu adingu niza.

“ nayi’ pasengalan minanam” a tademaw malecad tu adingu malalaba’, caay pakaletep kisu, nika mikilul i tapingan isu, anu misaicelang kisu cayka utang, a malacacay kita atu adingu, matalul, suayaw, macakat, lipahak, caysengal, ngutad, adingu malecad tu nisa adiding tu ita, u adingu ita amana haw, kawnika cacayen ita kalaluk kyu cayculal ku tangah.

u adingu mucebang tu nikabalakiyan ita, nanu wawa wakawak sahen ku adingu, katukuh ini kataniktik nu uzip, katukuh ini kabalaki makunul ku adingu, malawit cay tu tiku. simacecay amin ku tademaw tu adingu, la’tus kaw caykaw papili’an, caypiliyas. paenengenta ku kasenengan a adingu, tadimecmec han kuni cakatan ama uzip, ayza ya nisaicelangan isu paayaw tu adingu, anu zuma tu a demiad caykanca paini tisuwan tu telatela’.

anu izaway tu ku takelal izaway tu ku adingu, sisa u tademaw kay tini tu haw i takelalay, pasayza i takelal, milikeluh tu sakasaan tu takelal, manakaytizatiza tu i duutay, milamel i duutay. anu maselu’ i duutay haw, pisaicelangi tu tayza i takelalay, anu i teban nu zazan madaceb nu yadahay a bades, amana pisayadah ku balucu’, u sakasaan napacitan haw izaw tu ku sananal, anu maledu tu ku balucu’, sahemhem, sadungdung a mizatengan tu tatudu’en lalid misaicelang, mutenes kya haw kanca maliyaw isu ku duutay.

影子喜歡太陽和月亮。影子就像魔法師，中午没了蹤影，沒有生命，但因我而精彩。人生就像跟影子賽跑，永遠追不上它，但隨時停在身旁，影子就是我們自己的縮影，記錄我們成長，走過就不再重頭，好壞都無從選擇，把握人生階段、努力。

有光亮才有影子，如果不幸正處在黑暗之中，也要努力向光明前進。如果路途中遭遇了許多的困境，也不要灰心，因為黑暗之後就是黎明，只要有恆心、耐心，堅持理想與目標繼續努力，ㄧ定可以脫離黑暗。