朗聲四起

yako haeba:an ka kapa’onhaelan, lasiya ray kanman kin’i’iyaeh kawa:i’an ka kin Siyae’an, ma’ ’inmana’ a ’ima kayzaeh ka kaklohloehayan kaktatoroe’an.

maya’ mininSa’la’ a tomal ma’an kin Sekla’an ka kapa’onhaelan, siya hayza’ ’ima ’elngihan o ’ima ’inaro’ ka bekeS, kinmae’iyaehan konkononan o bolalasan, hayza’ ka ’ima kayzaeh ka hinaz’azem. yami rengreng ’a’iyalatar, ma’onhael kiSka:at, ray ’ima homawan ma’ ma’onhael makakSiyae’, sa’sa’ih ka hahila: kin kayzaeh ka hinaz’azem.

maya’ hingha’ ki yako minowa’ homoba:ang, kiSka:at, ’ae’ae:aew.

’ana rima’ ray kakiSka:atan, minaSa:eng ma’ miniyararoSa’, yami nakhara’ la:ong ’okik rasiwazay, naw komoSa’ ray kin’i’iyaeh So: ’oka’ hi maya’ ma’ ’am ’aewhay ka hin’naz’azem.

bi:il ila ’okik honaehnge:, ya:o Sekla’ ila naehan ka ’ima SaSo’ kapa’onhaelan, ’ima ra:am noka mae’iyaeh ka hinaz’azem hi ’away ki sin’elan ’ima ’e:nawan lalaw, hayza’ naehan kita’en ’ima’ sawsawa’an nanaw hi lalo’. ’away sin’elan ’ir’ira:i’an sowiti’ ’iniman siya ra:am kiSka:at, lalaw ’ibababaw siya ra:am ’omosa: ka mali’ , hi lalo’ hingha’ ki ya:o kin ’ibabaw o kerpe: sowiti’ ’iniman, siya ra:am homlal o ra:am ma:tol. yami sa’sa’ih ka hahila: ma’onhael kiSka:at, koma:at ka kina:at, komita’ ka tilibi:, makakSiyae’, ’a’iyalatar, kin’i’iyaeh nak pongaeh kin ra:nawan ’ima minpongpongaeh, nak Sapang ’aehael ’ima rararpe: kin kakaykayzaehan.

’ima kayzaeh ka kin’i’iyaehan ’okik honaehnge:, la maya’ ’aehae’ taew’an ’am bowaw ila ray kamra:waS kakrowaSekan taypae’, yami ’omahowiS a tomalan ka hin’naz’azem, yami paskayzaeh ’aehae’ kaho’alo’an kina:at ’ini maya’, paSiwa’ siya pakaykayzaeh pak’alikaeh Sekla’ ka ’ima SaSo’ kakrowaSekan, ’izi’ ’araS ka ’ima’ ’aewhay ka hinaz’azem, ’araS niya’om ka hino’alo’ sa’sa’ih ka hahila: paSiyae’ ka hinaz’azem, pakSiwa’ So: hayza’ ka ’ima honasamez ka hahila:,’ita’ ta:sa:sasbong ’ naehan tak’a’iyalatar sasapih ka ’ima ’okik hingha’ ka kinra:aman ki kin’i’iyaeh mita’, yami ma’ ’am maSriyae’ ’iSo’on.

ray kin’i’iyaehan rengreng hayza’ karasiwazayan kil kapa’onhaelan , ma’ hayza’ kasasbongan ka ’ima SaSo’ mae’iyaeh, So: hingha’ ka hinaz’azem ma’ ’am haysiya nak ’in’alayan. 

我有許多好朋友，是我快樂的來源、學習的對象。第一位好友是maya’，她有烏黑長髮、圓臉和善良的心。我們幾乎形影不離。戶外教學也總是坐在一起，沒有她總讓我覺得怪怪的。後來又認識了’away、lalaw和lalo’。’away比我矮，個性溫柔；lalaw個子高，天真可愛；lalo’和我差不多高，比我稍胖，總是笑臉迎人。我們就像姊妹般，一起看書、玩耍、談天，相處快樂。maya’要搬到台北，我們都很傷心，大家做了張卡片祝福她能適應新生活。我們也期盼有天能再見面、聊天。