朗聲四起

O tadamaanay a lisin no ’Amis ko kiloma’an hananay, Oya miliyasay to niyaro’ a talapotalay maomah a wawa, pahanhan a matayal a minokay micafay toni tadamaanay a sa’opo. Toni tolo romi’ad a demak i, o sakatosa a romi’ad ko tadasidemakay, pacelem a mapahoso ko radiw no yincomin, patodong ho ko kakitaan a miocol to finawlan to kasa’opo i sefian. pacafayen no fofo kami a pacaedong to riko’, hemek sa tayra i sefi, manengneng to ko cecay tosaay tingroh ko ka’akawang a pikacawan i raay, hay hay hay, caay ka raraw, ono yincomico:min aca koraan a sanek. Tahira sefi, nengneng han, siriko’ to nalitengan ho a caedong ko fa’inayan, fafahiyan, malitengay ato wawawawa, matedi a malikat ko cengel, tadamakapa:hay to.

O mitahidangay to cimacimaan a kero ko sa’ayaway a demak, malakitikiting to kamay maemin mapolong, cecay ko midiheciway, mitool a romadiw ko romaroma, patatodong to oo’ a misaarawrawrawraw a mekero, o niyah o mafokilay a romadiw ato kero i, kinapina ko perok, matool to ko pongpong no radiw, tadakalipahakan to a mihacafay to taoan a matawa a mahemek.

Malahok i sefi ko finawlan maemin to kalahokan, o misakohawan a titi no diyong, o siraw, o paheko, o lingkiw, pasikaenen han to hakhak, ono ’Amis to a ’aredetay a kakaenen ko ninian. Pakelang to kakapah no kalaheci tona tolo romi’ad demak sa, tala’alo a mifoting ko kapah i ikor, pakaen to malitengay no niyaro’, nga’ o makapahay a so’elinay a herek. Ira ko sowal no wina ako, o sirayrayay to kapotan ko ’Amis, pakini to nalitengan a salisinan, o kalodemademakan, ano i:ra ko hai no malitengay no niyaro’, nga’, o kapah to ko midadademademak sa. Pakini i kiloma’an a pantaay a kafana’an ako i, o cowa ka keton ko kero ato radiw, o ’aredetay a kakaenen no nalitengan ko aca, ka maolah kako to kaalawaw no niyaro’, mapawacay ira kako a mihafhaf to masafaedatay a hemek, cowa ko mama’aca no payso a so’elinay a lipahak koraan.

豐年祭是阿美族重要的祭典，離鄉的遊子都會放下工作參與盛會。頭目會催促到場集合。我們換上族服前往會場，男女老幼都穿著傳統服裝，漂亮極了。開場是迎賓舞，一人領唱其餘的人跟唱，配合著腳步圍成一圈又一圈，其樂融融。中午就在會場享用水煮豬肉、生鹹豬肉、三蘇菜、小辣椒搭配糯米飯傳統美食，年輕人最後還會去河邊抓魚給部落長者們吃。阿美族有年齡階級制度，傳統祭祀、活動形式，由耆老認可再交由年輕人執行。