朗聲四起

Malahoday a malakalotamdaway a tamdaw, nikaorira ano makalotamdaway aca a tamdaw i, iraay to ko sapilihadayaw a harateng i kemod no faloco’ nira. O lihaday hananay i, anca o malahoday mimingay a demak, anca o fangcalay a radiw aca, anca o makapahay a conga aca, anca oya tano miawidayay a faloco’ a mitayal to sakalipahakaw no niyah to a demak, oyaanan masamadahay, mimingay a maparoay a faloco’ a:ca. Adihay ko marorayay to na’oripan a mi’a’araw to lihaday a tamdaw, so’elinay i, i tihi aca no taripa’an ko lihaday, loho han, makamet to.

O ’atekakay a losidan, fangcalay a demak o lihadayay to kiraan sa, cowa ka tatodong kora sowal, anca iraay ko mangelo’ay mangocihay kiya. Ano o dademadema:ken aca a ’inorong ako sa kiso, ano samaan to ko masaheciay i ikor i, o lihaday to koni narakatan, o lihaday to koya kalipahakan i narakatan.

Macedem ko pitinako to lihaday, anca cowa kafana’ ko niyah to masamaanay ko kaira no lihaday. O so’elinay i, “ O nemnem to no kalolihaday ko ’orip ”, matayal to kaolahan no niyah a demak, miradiw to kaolahan no niyah a mitengil a radiw, fereten ko kalorawraw, pa’osawen to cecay a defak koya ’araw’away a faloco’, palomaen to cengo no kilang no faloco’, a pananom, a patai’, minengneng to kata’angay no cengo no kilang, o lihaday to kora.

O mapapafatifatis ko lihaday hananay, pakafana’en ko tao to lihaday no niyah, mapakafana’ camira to tadaolah iso i camiraan, mapatinako to lihaday ko alomalomanay a tamdaw. Mapafatis to i, malipahak ko faloco’ a maparo, o sata’angayay to a lihaday koya. Mansa, ano hacowacowa to paifaloco’en to ko sapidamaaw to cimacimaanan, pafatis to lihadayay.

O sapisetek to kasilihaday anca cowa a tadamaanay a lalengatan ko cisida’itay a faloco’, ano hacowacowa to, i cowacowa to, pasowalen koya namalitemohay ho iso a tamdaw to kalihadayan iso, o kahemekan iso, o sedi no miso. Ano ira ho ko masetekay iso a patosokan i, ira, ca katoka a pakini tona patosokan a misa’icel, i tihiay to ko lihaday, kawih han ko kamay, matama to. Rorayen ko tireng a mikilim to lihaday, ka o pakanga’ayen to ko niyah ko matatodongay, papi’arawen ko lihaday to niyahan.

再平凡的人，都會有個追求幸福的夢想。去做件讓自己愉快的事，就是「幸福」。幸福就在腳下，彎腰就可以拾取。完美的事物不一定是幸福，有時幸福是殘缺不完整的，幸福就是過程中的樂趣。其實，「生活就是一切幸福的泉源」。

幸福需要分享，讓更多的人感受。心靈上愉悅而滿足，是更大的幸福。時刻要記得幫助他人、分享幸福。將幸福、快樂、微笑，告訴所見之人。擁有目標，為目標努力，幸福就會在身邊，讓自己變好，也讓幸福來找自己。