朗聲四起

arinani kiʉlʉsʉaku tamu’u mahlukua sakʉrahlʉ Taungalana, kisuaku tamu’una marupatʉkʉ sakʉrahlʉ, marisʉsʉmʉtʉ lʉhlʉ’ ʉ, hla maihlʉmʉhlʉmʉ maipuhlipuhli, mailʉpʉngʉ marucua tamu’una, patʉkʉ sakʉrahlʉ papupucu kiu’u pusipiaapuhlu, kʉmʉrangʉmana tamu’una, inaluvui’i pauihlaku, ahli’aimau tam marʉmʉ, marucuamuisana tusasuatupuru arupahliakua rumiacua tamu’una, kihlahlahlamu hlicalivaisa kiariari kisutʉahlʉa tamu’una sikisuahlahlama Takiiarʉna, hlimungahlʉ akuisa hlalimarahli.

tahlana Hla’alua kiariari, maruka sikilalialiaisa laihlausua Takiiarʉ, maci kurarau Miatungusu ia patasuuru kurarau kiaʉnʉmʉ aari ahlamaahlʉ aarika rahluaisa, maci kurarau tam tumahlaʉka cucu’u, kuhlaisai umalacu rupuhlu, mataingalʉ mavacangʉ mapaci hla aanʉ, kukakuakucu uumu, hlimungaahlʉ kurarau kimaahlʉ aari, ma Miatutungusu usiacu aari rumahlaʉ, maruka cacihli hlamama, marasaicuami kilaliali, umarucarucakʉ amiami, tangumiaita tumahlʉpʉngʉ pataisa Takiiarʉna, kiatumuhlu aari kilaliali, mataku uasa taku’i’iarʉ, iniangahlika aanʉta aunanaita i milalaucu? sianatacua Takiiarʉna, alʉmataahlusu sakʉrahlʉna.

maruka cucutahlanata usumanʉ, hlahlimariputuisana tangumia minisua, kana’a hlamamana kutararianʉ, maisukasʉ umala hlarangirangi, cumavu Takiiarʉna, musa mukakakua sakʉrahlʉ Taungalana, sapatavila matakua sahlumu, hla apuahlusu Takiuarʉna pakaritʉkʉhlʉisaka sapatavila, rumahlaʉ kuahlusu ararataʉka sahlumu sakʉrʉhlʉ muvalʉ, kumita hlamamana maramanga’a arakicacʉ mʉrʉhlʉ, kuiau acahli matavilau pasakulai tapikakua ahliacuvungaisa Takiiarʉna, mulasahlʉ makakarisana, masivacavacangʉ kucuaku’ai ariari, amianisua mʉrʉhlicu, saluacu malikiaili tausuarauvua, mingahlangahla Mitungusu mikucuhlimʉtʉngaʉ ucaci aarina, angahli hliparahlia kana’a, mʉrʉhlicuka cucutahlana kucuasapusapu pakituru kilalialisana.

kisulʉpʉngʉa tamu’una kisuahlahlama, talaʉlʉsʉakuisana tarakakua sakʉrahla amihla tamu’u, macuara taisacu ia, kukia asapu kani’i kisuahlahlamana, tumuakia pakiaturu hlipimiahlamama kiariari, takuhlusuhlusu Miatungusuna iniciki’ai mulavaʉa Takiiarʉna, maiatuhluhlu ihlata.

爺爺講起關於聖貝祭的故事。以前聖貝祭是六天到十天。有次是舉行十天，在祭典第九天時，有位耆老要把聖貝丟溪裡，不理族人勸阻，把十二個聖貝用布包起來丟向溪裡。神奇的事情發生，聖貝沒被流走，溪水反而轉向，耆老非常害怕，趕緊跪在聖貝前說：我再也不敢了，又把貝神帶回祭場上，繼續剩下一天的祭典。自從那次，族人就不敢再偷懶，按時準備、參與祭典。

爺爺說：未來也要繼續遵循祖先的教訓來預備聖貝祭，才可以使貝神守護我們。