朗聲四起

hini sa tu sanek, malatusa kina sasanekan, cacay han a sanekan sapi’ sa ku balucu’ , u bangsisay han kuyda. duma satu saneken nu mita muli’ kita mikasanek, u angtulay han ku mahidaay a sanekan. itini i hekal, inika udipan nu mita, tatenga yadah ku masahicahicaay a sanekan. saan tu bangsis, nika sipakayda i cilecilekayan, metalaw kita makasanek tiya sanekan. mahida u papah nu dakes, makayda i kilang mipicpic tu cacayay a papahan, lutluten tahekal ku micidekay nu bangsis a sanekan. alaen nu mita misasimal, palasasapayuan, padegeng i cukuyi, idaw ku sapibahbah tu dadipis, puduh, aayad, cilekay, alisalap, kakatu a laluutan.

canacanan a sanekan, caay namin kalecad ku nipisanek nu mita, alahican mahicaay kya ku balucu’ ita, katukuh tu nikalaliyun nu puu’an. lutucan, macebalcebal namin ku bangcal nu balubaluan, u kasilusayan nu kilang, sa kapahay a demiadan. ya bangcalay salunganan nu kulikulitan a balu, alahican idaw ku micidekay nu bangsis, mahiniay a bangsis, u papilinglingay tu kaketi, adipapang, puduhan, manglay papatayda tu cilekay micepcep tu sicedam, tumes satu nu sicedan ku kuku’, tayda aca i dumaan nu baluan, i kuku’ay a nipicepcep tu sicedam, alahicaan mahetik tu, nikalalidan nu balu, sipakayni i cilekayan a masasupaini maaedap, ya lusay haymaw sikawaw  masasupaini.

laluday a belalangad mukanay tu malahulay nu kilang, u papah ku sakaudip, micidek ku nikan tu sisalangay nu lusayan, ciyak, manggu u sakanamuhan namin. u manggu satu, idaw ku picidekan nu maku a kawaw, idaw ku cacayay a demiad makayda kaku i sasa nu mangguan, hetik saca ku tadamaduhemay nu mangguan i nuayawan aku, ya mahetikay nu mangguan bengaw saca ku bangsis, katukuh tu nikahetik a malahul, nikahetikan bengaw sa ku bangsis namaka pabaw namaka sasa namaka tapiingan a bangsis, tunika bangsis kapawan hantu nu maku tu ku nikadidi’en a kahetikan i tangah nu maku.

sadingsing, muculil i talitalingan, beliw sa ku bali mangayangay ku tipus, langdaway nu tipus a papahan, mikilul tu bali mangayangay, siwsiw sa masuni. mibaung tu namin ku tipus, mikilil tu bali mahuyahuy mangayangay. sadingsing pilangecan a puu’an, u kapahay a saneken ku bangsis nu tipus. ya sanek mahicaay ku nikainian, caay kita pakaadih caay kita pakakapet, nika sipakayda i bali nu nikabiwbiwan nu culil, makasanek tu sanekan i tini i hekalan matineng tu kita tu nikaidaw nida.

對於氣味，大致上可分成兩種，一種是聞起來很愉快的香味；反之，讓我們聞起來感受到噁心反胃的稱為臭味。在大自然中，充斥著許多的氣味。對我們香氣十足，對某些動物是避之唯恐不及的味道。

氣味還會讓我們感受到季節交替時的氛圍。春天花朵有鮮豔漂亮的顏色、濃烈的香氣。夏天的果香撲鼻。秋天是豐收的季節，是好聞的稻米香味道。氣味透過空氣的流動，使聞到味道的大地生靈知道它的存在。