朗聲四起

moso la ahoi ne noana’o ho eafou ’e cou a’toana, mo mav’ov’o ’o la hia ea fou ta cou, patola boepono, poa’av’u, zotayo, zonsoo, hoseoyʉ, mo maica ‘ola atuhca hioa , at’inghi mo mav’ov’o ’ola ti’a’ausna tamo macicihi.
maito eno boepono, panto tee boepono to mazozomʉ, la tocohu honci eno o’te mooyai pa’sʉthʉca, pantola boepono to mayuyuansou, mioc’o maezo mav’ov’o ’ola hia ti’a’ausnu homo boetono.

hote boepono, la ahoi teoa huyu to mayuyuansou, tac’u mooyai sikotva, tac’u mooeai sapiei, tac’u ea tote fohngu ho cʉ’cʉ’neni to ceoa, siho isi cu aepʉnga cʉ’cʉ’neni tenac’u seo’tʉneni ’o evomʉ, hocu ehkui ho ngov’eni to sikotvasi ’o cockusi, tenac’u poa maikukuyungu to sapieisi ’o feongosi to evomʉ. aepʉnga na ic’o, tec’u efo’a to ceoa, la ake’a na’a poa mamimipiohi, tena c’u pap’eta, ho lasi mumi, pantola ’oha mon’i mcoi ho tuefisa ’o fohngu, ta si cu yaica hafa ’o fohngu ho toekameosʉ, pantola na’no emomcovhi, ta c’u petohʉyʉ ekosʉ ho mcoi, hola maica tena aacnia yosu’ka ho i’eima, la maezo loyo ’ola o’te tuefisi to fohngu.

hola poa’av’u, ho tec’u sʉc’ʉhʉ tote yoni poa’av’u, tenac’u yunga ’o av’u, iho cic’u elʉ no yuansou, tasicu peobanga, honci ake’i botngonʉ na av’u, tahe toehungi ’o yuansou, tehecu peela pnaa honci eno moza seu’ca.

hote phomeo, la botngonʉ ’ola nʉthʉ, tena noteuyunun’a ho toʉsvʉsvʉtʉ note hia phomeoa, hola c’u aepʉngʉ toʉsvʉsvʉtʉ, tenac’u ianan’ou uhto te eoni. siho lac’u ahoi phomeo tena ahoi to pepesi, ho lac’u hmoi ’o pepesi tenac’u aepoha hmoi ’o mafafaengʉsi, aepʉnga hmoi, tec’u hmoi ’o oi’isi. ho lac’u maica iuniou tac’u toekameosʉ na yuansou ho yumio tola eongmʉ. i’o la o’te yumio tena nʉs’ʉha, siho micu hoepʉngʉ tenac’u acʉhʉ biebiemi nonte nʉs’ʉha, inala yaa ci fou tena acʉha hafa uhto la ahoza eoni ho toehunga teai. tenac’u aangaeza, ho la aangae la buemealʉ ho ahmʉmʉska, tenac’u ianan’ou mayo ’ola nʉthʉ ho sia to keʉpʉ hocu maine’e.

 

鄒族從很久以前就狩獵，有很多狩獵的方式，像是陷阱獵、犬獵、埋伏、泉獵、槍獵等等。

製作陷阱獵時，要先尋找獸徑，製作適合的陷阱隱藏好後巡視。犬獵時，找到獵物後，狗會追趕圍住獵物，獵人再射擊或刺殺。焚獵時，通常是要一群人進行，各自到分配的位置，焚燒時要先從上方、從中間兩邊，最後從底部燒，獵物會四處逃散，獵場燒完之後，獵人就會開尋找被燒死的獵物，並公平分配獵物。