朗聲四起

ininai iaku Baraubaw tu azazakuan, mathuaw maqitan a pruq Baraubaw, ianan mathuaw mara’in a wazaqan, numa manasha wa hudun mani, naak a taun isai wazaqan a shirishir, langqisusay naak a taun, numa maharan sa danshiqan, numa danshiqan a shirshir ianan ranaw a qalhufu, mathuaw manasha wa ranaw iutu. numa miaqay iaku musui qalhufu pakakaan sa ranaw numa mara sa qarithuy, numa tamalun a ranaw mathuaw mahaha, shungkash iaku dai, maqa naak a kuskus atruquzin sa tamalun. numa minriqaz ti apu Umin iakin mathathawa thithu, maqa iaku trikin sa tamalun a ranaw maqiaqia, muhiaw thithu munai shmashaw sa ranaw, mathuaw thithu ma’ania wa thau! numa lhungqiziqizi iakin.

apu Umin a taun miabariz naak a taun, mathuaw mapaqaqitan thithu masa naak a apura’in, maklalilit thithu munai naak a taun makaan sa afu, numa maqaquyash thaithuy ya kminaaniza sa afu, ma’ania thaithuy latusha maqaquyash Thau a quyash, numa fuifuilh thaithuy iakin Thau a quyash, maura iaku dai, maqa antu mafazaq iaku Thau a lalawa tu isisua, numa ani thaithuy mathathawa iakin ya muririw maqaquyash.

maqa uka shawashawan thaithuy naak a ama ina, shitusi thaithuy mawalhnaq a pruq kilhtuali, numawan miasuun iaku naak a apura’in masa apuki’ay isai Baraubaw. numa miaqay iaku muntatatal apura’in lash ti apu Umin, musui thaithuy buhat mubuhat, muntal iaku thaithuy mubuhat, numa musui thaithuy muribush, miku’untal iaku mutusi hudun muribush, numa apura’in mzai “ata dai! mathuaw ihu langqisusay, makalhturuturu a qamishan ihu.”, numa thmanithanit iaku, numa munai apu Umin mzai “miku’utantu thithu, puntal dai thithu!” numa apu Umin panaqa futulh lhai iakin, mathuaw iaku ma’alah’a. dadu! mathuaw madaidaz iakin thaithuy!

numa shitusi iaku mani mawalhnaq a pruq lhmupish patashan tu makthin tusha wa qamishan, pizaiza wa kawash uka iaku mutaun Baraubaw, numa minparhawayza iaku thuini mutaun, ba! ukaiza naak a taun a danshiqan, numa ukaiza sa ranaw a qalhufu, numa ukaiza mani apu Umin, ananaikin! paqrushaq iaku! mathuaw antu maqitan naak a shnaw, mathuaw mangqtu iaku thaithuy, naak a apura’in, apuki’ay numa apu Umin.

 

 

 

Baraubaw有很大的潭，也有很多山，我的家就在潭邊，小小的房子，寬廣的門口埕，門口埕的旁邊有間雞舍，那裡有很多的雞。我常常會去餵雞跟撿雞蛋。Umin阿公的家在隔壁，他跟我爺爺感情很好，常常到我家吃飯、唱邵族歌。

12歲時我去都市讀書，好幾年都沒有回Baraubaw，現在長大回來了，哇！家門口埕不見了，雞舍不見了，Umin阿公也走了，令人覺得捨不得！讓我掉下眼淚！心裡很難過，我好想念我的爺爺、奶奶，還有Umin阿公。