朗聲四起

kawaS his’alan, ropa:en ’ima homayap ka ’ima bolalasan homom, kita’en nak hinoba:angan. mak’aehae’ ma’ hayza’ kamahomayap ka kapapama’an maray kawaS, ’inay kiko: kas’oehaez ka kasbol nakhara mam homoba:ang ka kawaS, kin kayzaeh kita’en!

So: kawaS kin Siyae’ ma’ pakas’oehaez ka hahila: paktilka:an ka ’oemaeh, mahiyo’ ka ra:an, kayzaeh mita’ mae’iyaeh So: hayza’ ka pinamowa’an ’am matawaw ma’ ’okik ’ayboli. mak’aehae’ ma’ ’aewhay mina! hahila: So: tomayhobaz ’am Siyae’, siblaehan ka hinila:, rikrika: o tiS’a’i’ a tomal , mae’iyaeh ma’ mal’oehaez ila kapabebe:an o homaewaeh ka zingki’ pak’iya’zaw ka basang, ’inay zingki’ ’i:zo’ ’ima kas’oehaez kasbol mina pa’aewhay ka ’oemaeh ki kin’i’iyaehan.

kawaS So: kin Siyae’ mina porawSi’, ’inoral ma’ maybalbalay ’am poralom ka pinamowa’an, bine:ay karae’oe:on no saeboeh ka ralom ma’ lal’oz, So: kawaS pakbi’i:in a tomal mina ’okay pakarowa’ ka kin’i’iyaehan mita’, ’a’oral ’inay kawaS naka sinae:aeh ka ralom, ray ’oemaeh ’ana kano’ ma’ pa’aewhayen, ba:la’ mowa:i’ ka sasibo:, ’oemaeh minminhae:ar ila Somopoti’ ka’a’oSa’an ka ra:an, tinaew’an sinakeban nak sem’el ka ’ae’az homayap ila; ’in noka kaehoy a panga’ noka ba:i’ Si’alpotpotoeh o pakalbelen, mita’ noka mae’iyaeh kin’i’iyaeh ma’ ’aybolen a tomal, ’isa:a’ ’ita’ ’izi’ a ta:an ki kawaS babi’i:, pa’aewhay noka kawaS ka sinpeng.

kawaS malahang mita’ noka mae’iyaeh ka kin’i’iyaeh, ma’ min’ae:aew no ’oemaeh, ray ’oemaeh ’ana kano’ pinamowa’an nak kaehoy、hinbetel, kaSnay’oes’oeso’an ka Sinpanan ki kaSnaywasal ki lolongan ma’ papabasezen hahi:il noka kawaS, ’ita’ mae’iyaeh para:am ma’alo’ noka kawaS ka hin’alo’an ’inimita’, pakkaykayzaehan ’i’iyaeh ray hini ’oemaeh, ma’ kalahang Sobaeh ka ’ima kayzaeh kakrowa:Sekan ka ’oem’oemaeh mita’.

湛藍的天空和白雲像幅畫，飛機飛過時留下一道白煙，美麗極了。天空心情好時，太陽照亮大地，有助耕作；但若太過炙熱，人們開冷氣降溫，卻也產生廢氣，破壞環境。天空若喜極而泣，雨水滋潤作物、提供水源；若憤怒，暴雨傾盆，造成洪水與災害，影響生活。我們應珍惜天空，不能與之對抗。天空知道人與太陽的辛苦，夜晚便喚出月亮和星星守護大地。天空無時無刻不在保護著我們的一切，我們更該感恩與愛惜自然所賜的美好。