朗聲四起

kawaS his’alan, ropa:en ’ima homayap ’ima bolalasan homom, kita’en nak hinoba:angan. mak’aehae’ ma’ hayza’ kamahomayap ka kapapama’an maray kawaS, ’inay kiko: kas’oehaez ka kasbol nakhara ’am homoba:ang ka pinayziza’an ra:an, kin kayzaeh kita’en!

So: kawaS kin Siyae’, ma’ pakas’oehaez ka hahila: paktilka:an ka ’oemaeh, mahiyo’ ka ra:an, kayzaeh mita’ mae’iyaeh So: hayza’ ka pinamowa’an ’am matawaw ma’ ’okik ’aybol i’. mak’aehae’ ma’ ’aewhay mina, hahila: So: tomayhobaz ’am Siyae’, siblaehan ka hinila: a tomal, rikrika: o tiS’a’i’, mae’iyaeh ma’ mal’oehaez ila kapabebe:an o homaewaeh noka zingki’ pak’iya’zaw ka basang, ’inay zingki’ ’i:zo’ ’ima kas’oehaez kasbol mina pa’aewhay ka ’oemaeh ki kin’i’iyaehan.

kawaS So: kin Siyae’ porawSi’, ’inoral ma’ maybalbalay ’am poralom ka pinamowa’an, bine:ay karae’oe:on no saeboeh ka ralom ma’ lal’oz; So: kawaS pakbi’i:in a tomal mina ’okay pakarowa’ ka kin’i’iyaehan mita’. ’a’oral ’inay kawaS naka sinae:aeh ka ralom, ray ’oemaeh ’ana kano’ ma’ pa’aewhayen, ba:la’ mowa:i’ ka sasibo:, ’oemaeh minminhae:ar Somopoti’ ila ka ra:an, tinaew’an sinakeban nak sem’el ka ’ae’az homayap ila; ’in noka kaehoy a panga’ noka ba:i’ pa’alpotpotoeh o pakalbelen ma’ hayza’ ’oyaeh. mita’ mae’iyaeh kin’i’iyaeh ma’ ’aybolen a tomal, ’isa:a’ ’ita’ ’izi’ a ta:an ki kawaS babi’i:.

’ita’ mae’iyaeh pakra:am Sobaeh ’izi’ patin’ohay ka kawaS, ’izi’ tongtongay, ’izi’ hayza’ kapa’oe’oe’an ki siya. kawaS ra:am noka mae’iyaeh ka kinhopay, ma’ ra:am noka hahila: ka kinhopay, So: hae:wan ila ma’ tomrong ka hahila: ki mae’iyaeh Sa’ Sangay naehan, pawa:i’ ka ’ilaS ki binto’an miyalawa’ ka ’oemaeh.

kawaS malahang mita’ mae’iyaeh ka kin’i’iyaeh, ma’ min’ae:aew no ’oemaeh, ray koko:ol ’ana kano’ kaehoy pinamowa’an ma’ pabasezen, ’ita’ mae’iyaeh ma’alo’ noka kawaS ka hin’alo’an ’inimita’, pakkaykayzaehan ’i’iyaeh ray hini ’oemaeh, tatilhaehael kalahang ka ’oemaeh.

湛藍的天空和白色雲朵，看起來像一幅畫，有時飛機從天上飛過，從機尾噴出的煙霧彷彿畫著它經過的路徑，好美呀！

天空心情好，會讓太陽出現使大地明亮，照亮路途，而不致使我們人類在種植耕作上有所阻礙；太陽如果興奮過頭，面紅耳赤地照射，燒燙又炙熱，人們便拿出風扇開冷氣讓身體冷卻，冷氣所排出的廢氣破壞了環境與生態。

天空若喜極而泣，雨水會緩緩澆灌著所種作物，賜予人們的飲用水也將足夠。如果讓天空非常氣憤時，雨水就會像似從天上高處傾倒下來的水一般，大地被破壞殆盡，河川洪水氾濫，四處崩塌阻斷去路，建物屋頂像似長了翅膀飛了起來，樹木枝頭寸寸折斷且被推倒於地，人們生活生計受到干擾。我們人類必須懂得憐惜天空，不能存有與它爭吵對抗之心。

天空知道人類的辛勞，也了解太陽的辛苦，到了晚上，便稍事休息，喚出月亮和星星守護大地。天空無時無刻守護著地球所有一切，我們更要懂得珍惜天空所給予我們所有的。