朗聲四起

mokelangai aolrolai ’i vecahae gako ’a olriho’onga ’apikaa’aa’a. aanai ’a patalaki ’alilroolai paoleke ma’oalaingai, ma’iivaingai talrivataeni. lo mokelangata toramangele caili pavalrilo toramapo’ale caili, apahadhaolo ’aliki takalrima volrilo takapito caili. ’ina a’ivivai padhaadhalro’ine a’olalai papaela. kasakaine ka ocao tai’a ana, omi’aa takapaholahoolainga.

mokelangai dhona caili ’a papaelanga votolro’ota, tai’aeni ’aolai la ’avai, ’iidhemeta la tapa’iidheedhedhemaeta. toramoro ka matoalrai tapapaelaeni votolro’ota. ’aadhaanaenga takavotolroa’eni, takaolohaeni poelre ma’akaelenga, kaparananae mokavole takaicongaedha ’aolai la ’avai tapapaelaeni. topatilainga ’apososo a’ivivai, ’akosi’isi’inginga ’akodhadhao colo’olraeni, malripala’anga icini, mani topatilainga ’ikelren. la topatilainga a’olalai ’apongi’angi’i, ’akodhe’edhe’ele colo’olraeni, malripala’anga aliadhangaeni.

na’idhedhemengai papaelaanga. todhe’elrehenga takaocaeni la ta’amacaeni, madhalame ’inikalangeangeae, ’ataloaketaekai ka ’iidhemeni, kinalriho’onga apa’iidhedheme. dhomanae ’a ’apikaa’aa’a. lo mokesangai mamangele la kavalro volrilo ’akamapo’ale caili, mokelaanga ’alekalekataeni hoolrice caili, la topodhaolaenga masavare, mavalrovalro.

kanani toloraeni madhalame ma’akaelere savare la valrovalro, ma’akaelela taiaiaeni. omiki taia ’ina “amokatakolra lo’oni.” omikii taia ’ina “odholro pasopalra lokeve cinekelae lo mamoongongai.” la iiki taia ’ina “’iraki lo maongonae naolokeve ta’omaca ’i lroolai” omi. la niomi’o?

 

 

 

講述國小班級狀況，期望以後能到外地學習、認識更多同伴，並一一介紹各個同學的志願。最後獲得老師勉勵大家只要想做沒有做不到的事情。