朗聲四起

kasicuayan, izua ka ita cavilj, maru qemazalj a kalevelevan, na muqadaqadaw manu qemudjalj saka inianga kameljai a qudjalj a patjemasulem a patjemaljia, kemljang a ramaljemaljeng tu pasaliw aicu a kalevelevan aya.

manu paqulid angata a kai nua ramaljemaljeng. kapida anga qadaw a qemudjaqudjalj, sinivaik anga a marka quma, a marka tapaw a marka nanemanemanga a penuljat i qinaljan, kumalj a marka qemuzimuzip sinivaik anga nua zaljum a penuljat uta.

pai kemudanga itjen patjatjuayaya a taqaljaqaljan a mapuljat, tjara tjen a macai tua tja culjan aya tiamadjiu.

pai tuazua, izua macidilj a vavayan a pinaqaljai aravac nua timaimanga i qinaljan, a pinaka ti Ljaljumeg. Mangetjez a taqaljaqaljan i tjai Ljaljumeg a kivadaq tu uri kemudanga itjen tua tja tjaivilj a tja sikacu aya, nekanga nu nanemanemanga a maqati a tja kanen, nekanga uta a tja tjaljayan a uri tja sitalem a mumalj aya.

ka lemangeda ti Ljaljumeg saqetju aravac a varung nimadju, sa vaik timadju a sema tua gadugadu i qinaljan, sa pasa kalevelevan a kiqaung timadju tua naqemati a Cemas, sa qivu timadju a: “tisun a naqemati a Cemas, pacucun sun tu nasemturudj a ku sikataqaljan imaza, paseqeljingu amen.” aya ti Ljaljumeg.  

kacuai anga a vaivaik ti Ljaljumeg i djalan, manu pacun timadju tu izua tjuruvu aravac a namaqepuqepu a taqinaljanan izua, naseljenguaq a malevaleva a kemakan tiamadju a mapuljat.

pai kipasemalaw ti Ljaljumeg tua kalaingan nuazua taqinaljanan, sa tjaucikel anga timadju tu namakuda a kipaula tua zinaljuman nua sikataqaljan nimadju, saka kiqaung aken tu nu paseqeljing amen aya ti Ljaljumeg.

pai paseturudj azua kalaingan katua taqaljaqaljan izua, sa pakacui anga ti Ljaljumeg tua tjaljayan katua marka kakanen, sa kipacikel anga timadju a sema qinaljan.

ka djemaljun ti Ljaljumeg itua qinaljan nimadju, maleva aravac a marka taqaljaqaljan, ayatua izuanga a kanen, saka mapaseqeljing anga tiamdju a kemasi tua culjan katua kipaula. pai sa patjatju qivuivu a “tisun a tja sinika maqati a valjut, tisun a pinapuluqeman, tisun a napaseqeljing tjanuamen” aya mapuljat a taqaljaqaljan. saka kemasizua anga a tjaucikel taicu a ti Ljaljumeg a patje palalaut.

以前，部落遇到很神奇的事情，原本艷陽高照，突然下起大雨，就沒有停止。耆老覺得是不好的預兆，農作物、房屋東西都被水沖刷，牲畜、家禽也都全部被沖走，族人憂心。

菈露夢歌心疼族人，獨自到山頭向天求助，往遠處看到一個小洞穴，她走進洞穴，裡面有很多人生活富裕、歡樂。菈露夢歌會見領袖請求協助。當地領袖、人民送給菈露夢歌種子、食物，讓她帶回去，族人非常高興解決缺糧問題。因此，菈露夢歌就成為傳說中的部落女神。