朗聲四起
Nniqan ta sbiyaw o dgiyaq Paru ni yayung Paru. Meudus ta saw nii nniqan wana bi dha baga ka sduuy ta. Manu saw kiya ni smmalu bi qngqaya ka rudan ta sbiyaw. Paah phiyug sapah bitaq bi qngqaya blbilaq sduuy mkan nhapuy ga, snlaan baga kana. Ana snaw ana kuyuh tgkla bi mseusa kana uri. Nniqan dha ka psluhay dhyaan ni pltudun dha dmbbarah knegxalan duri. Ptpusu sapah ka dngsan dha, kiya ni mnduwa bi mddayaw ka mddungus. Quri shjil, brax ni ngangut o nsnaw kiya. Lhkah, pmkayun ni sapah do nkuyuh kida.
Snaw ga, smalu qngqaya uusa bbuyu, ddjiyun ana manu, aji uri o phiyug sapah ni biyi ni rpun. Bhniq, buji, qlubung, pucing, puniq, smbrangan, ttjiyal, srahug, leesug, towkan ni wahug ga, jiyun dha tmsamat miying uqun kiya. Sapah nniqun, rpun, paga, biyi rudux, libu babuy, biyi qmpahan ni biyi saan tmsamat ida mnda baga snaw. Duri ni kana blbilaq qngqaya djiyun saw ka quri cinun, mkan ni mahan, lbgan, brunguy, bluhing, rawa, giya, takil, gupuq, sisi, ni puqan. Manu snaw ga, rahuq na mnsa bbuyu ni bukuy knciyan aji uri o qmuyux siida, ida ta qtaan ka ddsnaw tluung siyaw tahut ni gaga smquri, smalu aji uri o rmuyuk. Ungat sangay dha wah!
Kykuyuh dga ida tminun ka pusu bi ddaun dha. Mhuma krig ni qmnuqih. Lala bi euda na ka qmnuqih. Smqit krig, mhug krig, smkrig, rmbug qsiya sminaw, qmnuqih, tmgiya, dmaus, mhapuy waray, musut waray, ni dmgsay. Tminun sla, pala, ni habuk plkusun snaw. Duri ni tminun sla, usux, pdagit ni habuk plkusun kuyuh kida. Mhapuy euqun kingal ruwan sapah o kika tgparu bi euda kuyuh uri. Lnglungi binaw! Seuxal o wana baga aji saw sayang. Mtahu, smungu, miyuk, ana manu euda hhapuy wah! Manu bubu mu o pgrpaw bi siida, tluung “Powng! Powng!” msa gaga tminun ka hiya da. Duma na o lmihug qumi empsais lukus. Duma na o tmikan ni tmbus. Gaga hmlama hlama blbul aji uri o tutu hlama uqun smiyan. Nhdaan do kika sun pnspingan da, snirug, giji, susu, pqsul ni brikug, aji uri o towrah ni trak.
Mnegseusa bi ka ita Truku sbiyaw. Tai ka seejiq ini kla mseusa dga, seejiq emputut sun!